Jowai, Jylliew 11 : Ka jingïalehkai Badminton kaba la tip kum ka 20th Open to all Badminton Championship 2023, ïa kaba la pynlong da ka Loompyrdi Ïongpiah Sports and Games Committee, Jowai kala poi noh sha kaba kut ha kane ka janmiet jong ka sngi saitjaiñ.
Ïa kane lynpung la pynlong ha Ïndoor ka Seiñ Raij Jowai kaba don ha Tpep-pale (Madan Ryngkaw), ha kaba u Officer Incharge ka Jowai Police Traffic u ma Sunday Manners u la long u kongsan, ha ryngkat ka jingïadonlang kiwei de ki riew rangbah.
Ha kane ka Tournament haka jingïakhun final jong ka Under-16 Boys Double la ïohrah ïa ka da u Lechan Suchiang bad u Nihipaia Suchiang kiba la pynliem ïa u Hunbait S Manners bad u Dapmon Papang da 21-12, 14-21 bad 13-21.
Katba ha ka jingïakhun para marwei ha ka kyrdan Under-16 Boy Single u Aebhami Bareh u la jop pyrshah ïa u Lechan Suchiang da 21-16 bad 21-11. Ha ka kyrdan 35+Men single u Ram Najiar u la jop ïa u Da-u-ru Laloo da 21-12 bad 21-16. Katba ha ka 35+ Men’s Double U Rimilan Passah bad u Da-u-ru Laloo ki la pynliem ïa u Damehi Kyndiah bad u Marbiangki Bareh da 21-19 bad 21-16.
Ha ka jingïakhun ha ka Women Double pat ka Ribhalang Passah bad ka Wakani Toi ki la pynliem ïa ka Ibalari Siangshai bad ka Prety Mary Sumer da 21-16 bad 21-15. Ha ka jingïakhun jong ka Mixed Doubles pat ka Ribhalang Passah bad u Deilangwao Nongpluh ki jop ïa ka Emilanadaka Chyrmang bad u Hrisami Passah da 21-18 bad 21-14.
Ha ka jingïakhun jong ka 55+ Men’s Doubles u Wanmi Dkhar bad u Alan Niangti ki la jop ïa u Dabiat Kyndiah bad u James Monroe Pohsngap da 21-16 bad 23-21. Ha ka kyrdan Men’s Doubles Open pat u Bulangki Lakiang bad u Deilangwao Nongpluh ki la jop ïa u Deymeniv Shullai bad u Peterson L. Lamare da 21-14 bad 21-16. Ha ka Men Single Open pat u Deilangwao Nongpluh u la jop ïa u Ram Najiar da 21-09 bad 21-13.
U kongsan u ma S. Manners u la ai ka jingïaroh ïa kane ka Sports Committee jong ka Loompyrdi Iongpiah kaba la lah ban pynïaid manla u snem ïa kane ka Tournament kaba la long haduh 20 tylli ki snem jong ka jingïaid lynti, u la ong ruh ka jinglah jong kino kino ki kynhun ban pynlong ïa ki kam ïalehkai sport kan ïarap shibun ïa ki samla ban lait na ki kam ba sniew khamtam ka jingngop ha ka jingdih ïa u Drugs uba kynrei bha ha kane ka West Jaiñtia District.
Kumta na ka liang jong u, u la kyntu ïa kiba bun balang khamtam ki shnong ki thaw ba pynlong ïa ki jingïalehkai bapher bapher ka ban ïarap ha ki liang bapher bapher ïa ki khun samla.
Ïa ki khusnam ha kane ka janmiet la sam da u kongsan, kumjuh da u ma C. T Laloo Chairman jong ka Sports and Games Iongpiah, ma R. D Sungoh President Laskein Block Association, ma Alan Niangti Waheh Shnong Iongpiah, Secretary ka Loompyrdi Ïongpiah Sports and Games Committee, Jowai u ma Teddy Laloo bad kiwei de.
