Shillong, Nohprah 05 : Ïa ka jingïakob mareh marathon kaba nyngkong eh ban pynlong hangne ha Jylla kaba la tip kum ka 1st Sohra International Half Marathon 2022 na ka liang ka AFI ka la dep ban pynbiang pynbiang ha kaba ïadei bad ka jingpynmareh.
Katkum ka kyrwoh khubor na u General Secretary ka Megalaya State Olymppic Association (MSOA) u Bah Finely L Pariat la ïathuh ba na ka liang ki stad ka thew ha woh jong ka AFI ha ka sngi U Blei ki la dep ban pynbit pynbiang ïa ki jaka ban sdang bad kut ka jingmareh ryngkat ki katto katne ki jingpynkylla.
Ïa ka jingmareh na bynta ka kynhun Elite bad ki nongmareh jong ka Meghalaya kynthup shynrang bad kynthei yn sdang na Mawkdok sha Nongsawlia. Sdang ka jingmareh ba 10km (Men& Women) na Sohra Rim haduh Nongsawlia. Ka jingïakob mareh ba 5km la shah sngewbha khlem jingsiew, baroh ki nongïashim bynta kin ïohei ïa ki sopti, ïa baroh ki nongjop yn sam takma.
La ïathuh ruh ba ka MSOA ka la pynbiang ka bam bad ban kit ïa ki nongïalehkai da ka bus na Soso Tham Hall kaba don ha IGP naduh ka por 5:30 baje mynstep ban buh haduh Mawkdok, ka jingïakob mareh kan sdang ha ka por 7:00 baje mynstep bad ïa ki number (chest number) yn sa sam ha ka 19 bad 20 tarik Nohprah 2022.
