Shillong, Naiwieng, 26: Ka Kynhun Myntri ka Sorkar Jylla ka la mynjur ïa ka jingpynbeit thymmai ha ka Section 34 jong ka Meghalaya Value Added Tax (VAT) Act, 2003 kaba thmu ban kyntiew ïa ka jingïoh lum khajna.
U Myntri Rangbah ka Jylla Conrad K Sangma u la ong da kane ka jingpynbeit thymmai la bujli noh ïa ka kyntien “Bonded Warehouses” sha ka kyntien “Central Bonded Warehouse” da kaba pynkynriah ïa ka jaka lum khajna VAT sha ka Central Bonded Warehouse.
“Kane ka jingpynbeit thymmai kan pynthikna ba ïa ka khajna yn lum ha kawei ka jaka, ban pynduna ïa ka jinglait ei ka khajna bad ban kyntiew shuh shuh ïa ka khajna jong ka jylla,” ong u Sangma bad bynrap ba kane ka jingpynbeit thymmai la khmih lynti ba kan kyntiew shibun ïa ka jinglum khajna jong ka jylla.
