Mairang, Risaw 30: Ka Deputy Commissioner Eastern West Khasi Hills District Mairang, ka la pyntip paidbah ba la dep ban pyllait ïa u khaw Ration jong u bnai Risaw sha baroh ki dukan Fair Price Shop (ration) kiba hap hapoh jong ka Eastern West Khasi Hills District. Ka jingsam ïa u ne u khaw kan long katkum ka jingbthah, kata u khaw PHH, mar 5 kilo shi khlieh briew bad ym donkam ban siew pisa, u khaw AAY mar 35 kilo kawei ka card khlem da donkam ban siew pisa bad u khaw Non-NFSA mar 7.205 kilo kawei ka card ha ka dor 13.35 tyngka shi kilo. La mana tyngeh ïa baroh ki Fair Price Shop ne ki nongsam khaw ration, ba kim bit ban ai duna ne ot kilo na ka bhah ba la buh bad mang da ka sorkar ha kaba ïadei bad ka jingsam ïa uno uno u marbam ba la ai na ka NFSA bad Non-NFSA.
La bthah ruh ïa baroh ki Fair Price Shop dealer ba kim dei ban pynduh khaw ïa kito ki nongbam wat lada kim pat don ïa u Aadhaar Card ne kito kiba la kum pynjah ïa ki ration card jong ki. Ha kaba ïadei bad ka bai lut bai sep ban kit bad pynpoi ïa kine ki marbam sha baroh ki Fair Price Shop, yn bei pisa da ka sorkar sha ki wholesaler ne Dealer kumba ju leh na ka por sha ka por.
Lada lap ïa kino kino kiba pynkheiñ ïa ki kyndon ba la kdew kin shah pynshitom katkum ka aiñ. Lada don kano kano ka jingbym tikna ha ka jingsam ïa ki mar ration sha ki paidbah, ki nongïoh bhah ki lah ban phah da ka jingthoh sha ka ophis u District Grievance Redressal Officer bad sha u Additional Deputy Commissioner (Supply), Eastern West Khasi Hills District Mairang, lane ban shu thep hapoh ka Complaint Box kaba don hapoh ha ophis u Deputy Commissioner.
