La pyllait paidbah ïa u injek CORBEVAX ha EJH ban ïada na u COVID

Khliehriat Lber 29 : U Deputy commissioner ka East Jaiñtia Hills District, u Abhilash Banarwal, IAS mynta ka sngi u la pyllait paidbah ïa u injek CORBEVAX ha East Jaiñtia Hills District, uba dei na ka bynta ki khynnah kiba 12 snem kyrta haduh 14 snem kyrta ban iada na ka khlam covid-19.
Ha kane ka sngi ki la don haduh 41 ngut ki khynnah kiba ha ka kyrta kaba 12 snem haduh 14 snem kyrta kiba la shim ïa u injek CORBEVAX, ha ka dose ba nyngkong u ban ïada na ka khlam covid-19.
Haba kren haka jingialang u Abilash Banarwal, u la kyntu ïa baroh ki khynnah ba ki dei ban ïa phylliew jingmut bad ki nonghikai kumjuh ruh bad ki kmie ki kpa lada ki don kano kano ka jingsngew artatien, kumjuh ruh u kyntu ïa ki nonghikai ba ki dei ban iakren ïa phylliew jingmut bha bad ki kmie ki kpa bad pynsngewthuh ba kane ka injek covid-19 , CORBEVAX ka long kaba donkam bha na ka bynta ki khynnah.
U District Medical and Health Officer East Jaiñtia Hills District, u Dr D. Shylla, u punshlur ba dei ban shim ïa kane ka lad ban iada ïa ki khynnah na ka khlam covid 19 da kaba ai ïa une u injek CORBEVAX
Kiba la ai jingkren ki kynthup ruh ka Nurse, ka kong O. Lywait, kaba la batai shai bha ha kaba iadei bad une u injek CORBEVAX Covaxin u ban iada ïa ki khynnah kiba 12-14 snem na ka khlam covid-19
Kumjuh ruh ki la don 26 ngut kiba la ha ka kyrta kaba 15 haduh 19 snem kyrta bad 6 ngut kiba ha ka kyrta kaba 18 snem shalor kiba la shim ïa ka injek Covidshield ban ïada na ka khlam covid-19.
Kumjuh ruh la ioh jingkren na u Director, Little Star Secondary School Lasrymbai, u bah P. Phawa bad kiwei kiwei.
Ïa ka prokram la pynlong ha Little star Secondary school Ladrymbai ha kaba la ïa wan ban ïa shim bynta lang da ki nonghikai bad ki khynnah skul.