La pyllait paidbah ïa ka ‘Tithi Bhojan’ ka prokram ai jinghikai halor ka bam batei met

Shillong, Risaw 19: Kum shi bynta jong ka District Nutrition Leadership Plan (DNLP) kaba dei ka jingsdang halor ka prokram hikai ïa ki bam batei met ka “Tithi Bhojan” la pyllait paidbah ha Baghmara C&RD Block.
Ïa kane ka prokram la pynlong da ka jingïatreilang bad ka Meghalaya Early Childhood Development Mission (ECD Mission), MSRLS, ICDS bad ka tnat ka Koit ka Khiah.
Ïa ka prokram ba la leh nyngkong la pynlong ha ka shnong Jaksongram ba hab ha Block Baghmara ha kaba ki nongshong shnong ki wan lang da ka mynsiem ban sam ïa ka jingkitkhlieh ha kaba na ka MSRLS ka sam ïa ki pylleng na ka bynta ka jingïabam ja lang ki khynnah.
Haba pynïaid shakhmat kane ka prokram ka dei kaba la pyrkhat ba manla ki Village Organisation (VO) kin dei ban pynlong ïa kane ka prokram shisien ha ka shi bnai bad ban lum ki lad jingïarap bad kiwei ki tyllong na ki tnat ban pynïoh ïa ki pylleng bad shi klat ka dud ban bam ki khynnah.
Ha kane ka sngi u DC ka South Garo Hills u Sumit Kumar Singh (IAS) u la thung ïa ki tynrai dieng, kaba dei ka dak ka jingsdang ka jingïaid lynti ban wanrah ka jingkylla ha ka bam kaba tei met bad ban pynneh ïa ka roi ka par ha ka District baroh kawei.
Ha kane ka prokram la wan ban ïashim bynta jong kumba 50 haduh 55 ngut ki riew shimet ba kynthup ïa ki khynnah haduh ka rta kaba 8 snem, nangta ki longkmie ba armet bad kiba dang ai buiñ bad ki rangbah shnong, ki nonghikai ha kaba kane ka wanrah ka jingsngew longtrai bad ka jingïalong paralok.
Kane ka prokram ka la ïoh ka jingïaroh na ki nongshong shnong bad kiwei kiwei, kiba la pynpaw ïa ka jingmon ban bteng ki jingai jingkyrshan bad ban pynïar, ban pynphriang ruh ïa kane ka prokram sha kiwei ki jaka naba kane ka long ka dak bad ka sienjam ban pynbha ïa ka bam batei met jong ki khynnah, ban kyntiew ïa ka koit ka khiah bad ban wanrah ruh ka jingkhlaiñ jong ki nongïalam shnong ban wanrah ki jingpynsngewthuh halor ka koit ka khiah jong ka lawei ban wan.