Nongstoiñ, Risaw, 02: Ka Balang Katholik lyngba ka Nongstoiñ Diocese ha ka sngi u Blei, ka la ïoh ban pyllait paidbah ïa ka Kotbah Katholik ha ka Ktien Khasi, kaba dei kaba la pynjanai kham bha shuh shuh ban ïa kaba la shon ha u snem 2006.
Ïa katei ka Kotbah ne ka Baibyl Katholik ha ka ktien Khasi, la pyllait paidbah da u Administrator jong ka Jyllaniam Nongstoiñ u Rev. Fr Anselm Nonglang Diocesan , ryngkat ka jingïadonlang u Fr Johny Nongkynrih Assistant Parish Priest ka Kynshi Parish, Dikon Lamkupar Shangdiar bad ki riew niam.
Ïa katei ka jingïalang pyllait paidbah ïa ka Kotbah Katholik, la pynlong ha madan skul jong ka St.Dominic Kynshi, ha kawei na ki jingïalang kyrpang kaba ïakynduh lang ki samla jong ka balang ïa kaba la tip ruh kum ka Annual Youth Meet jong ka Seng Samla Katholik Kynshi Parish, kaba dei ruh ka sngi pynkut jong katei ka jingïakynduh lang ba la pynlong haduh lai sngi lynter.
U Rev Fr Anselm Nonglang Diocesan Administrator Diocese of Nongstoiñ, shuwa ba un pyllait paidbah ïa kitei ki Kotbah, u la ong ba kane ka sien shon kaba mynta ka dei ka pali kaba saw bad kaba la pynwan dur khambha ne kham bniah shuh shuh bad la pynjanai na ka bynta ki khun jong ka Balang, khnang ba kan long ka jingmyntoi ïa kiba pule ïa ka.
“Ha kaba ïadei bad ka bai lut bai sep ban shon ïa kitei ki Kotbah, la ïarap pisa lang ruh da ka Germany ACN bad yn pyndonkam ïa kitei ki Kotbah da ki 15 lak tam ngut ki Khasi kiba don ha ki Diocese bapher bapher kaba kynthup ïa ka Shillong, Jowai, Nongstoiñ, Aizawl, Diphu bad Bangladesh. Nga dap da ka jingsngewnguh eh ïa U Blei u ba la kyntiew ïa ka jaidbynriew jong ngi ban kynjoh shaduh kane ka kyrdan ban tip ïa U, ban shakri ïa U bad ban im katkum ka hok ka sot, khamtam eh ban ïai sngap ïa U lyngba ka jingthoh Bakhuid ka Kotbah”, u la ong.
