La pyllait ka pisa sha u contractor khlem pat pyndep pura ka jingtei ïa ka JJM projek, kynnoh ka APA

Shillong, Naitung 14: Ka seng A·chik Progressive Approach (APA) ka la thoh sha u officer in charge ka Ampati police station ban phah ka jingujor pyrshah ïa ka tnat Public Health Engineering, nangta ïa ka North Eastern Development Finance Corporation Ltd (NEDFi) bad ïa u contractor ka thaiñ halor ka jingkynnoh ba la sam bad pyllait ïa ka pisa kaba la palat T. 40.60 lak na ka bynta kawei ka project kaba ym pat lah ban pyndep pura.
Wat hapdeng ka jingong jong u Myntri ka tnat PHE ha u bnai Ïaïong ba ki jingsiew haba ïadei bad ki jingpyntreikam ïa ka JJM project sha ki contractor yn sa ai tat haduh ba ia ki kam la pyndep pura bad hadien ba la ïoh ka jingpynskhem da ki third party inspector, kaba dei ka NEDFi, hynrei kane kam shym la long satia kumta wat ba, bun na ki kam jong ka project kim pat dep pura satia, kynnoh katei ka seng.
Halor kane ka kam, ka la don ka jingtih ïa ka pung um bad katto katne ki bynta jong ka treatment plant la dep ban tei hynrei kine artylli kim don ki jingpynïasoh da ki pipeline. Shuh shuh kam shym la don ka jingpynïasoh sha ka pump um bad kam don ruh ka jingmih ka um na ka pung sha ka treatment plant ne sha kino kino ki top um.
Na ka liang ka APA ka la buh ka jingkylli ba kumno ka third party ka lah ban pynskhem ïa ka jingsiew jong ka “running bill” sha u contractor khlem da pyndep ïa ki katto katne ki kyrdan jong ka kam.
Ka jingujor ka kam ruh ba ka JJM dashboard, ki jingkhein ba la pynpaw sha ka jylla bad ka sorkar pdeng ka pyni ba 100 percent la pynïoh ka jingpynïasoh da ki kor um sha ki 30 tylli ki longïing wat la ym don napdeng kine ki ïing kiba la ïoh ka jingpyndait da ki kor um kiba hapoh kane ka project.
Ka APA ka la ong ruh ba kam shym la don kata ka Village Water Sanitation Committee ha ka shnong Jengitchakgre. Ym lah ruh ban pyntreikam ïa ki JJM project khlem da ïoh ka jingmynjur ne ka jingdon jong kane ka committee. Kumta na ka liang ka dawa ba dei ban pynlong ka jingtohkit kaba pura da ki pulit halor kine ki jingkynnoh.