La pyllait ïaka Draft Electoral Roll ha Ri-Bhoi, mih thymmai sa 2 tylli ki jaka thep vote ha Mawhati

Nongpoh, Risaw 27: Ka ophis jong u Deputy Commissioner ka Ri-Bhoi District mynta ka sngi kala pynlait paidbah ïaki kyrteng jong ki nongthep vote (Draft Electoral Roll) jong ki 5 tylli ki Assembly Constituency ha Ri-Bhoi District ba kynthup ïaka 8-Mawhati. 9-Nongpoh, 10-Jirang, 11-Umsning bad 12-Umroi bala aiti ruh sha ki seng saiñ Hima bapher bapher ha Ri-Bhoi haka jingïalang kaba la long ha Conference Hall jong ka ophis ka Deputy Commissioner.
Ha kane ka jingïalang la ïoh ban ïakren halor ki katto katne tylli ki mat kiba kongsan kata ka long halor ka jingpynmih sa 2 tylli ki Polling Station hapoh jong ka Mawhati Constituency kata ka Umkhang Polling Station bad ka Mawlaho Polling Station.
La pynsngew ruh halor ki jingdon jong ki Polling station hapoh jong ki 5 tylli ki constituency, kata ka Mawhati (ST)AC ka don 67 tylli ki PS., ka Nongpoh (ST)AC. Ka don 68 tylli ki PS, ka Jirang (ST) AC ka don 77 tylli ki PS, ka Umsning (ST) AC ka don 66 tylli ki PS. Bad ka Umroi (ST) AC ka don 55 tylli ki PS. Kyllum lang baroh kin don haduh 333 tylli ki PS hapoh 5 tylli ki constituency jong ka Ribhoi.
Haba kren ha katei ka sngi naka liang ka kong B Ranee Additional Deputy Commsisioner ka Ri-Bhoi District kala ong ba ka EPIC ka long kaba donkam ban pynshisha ruh ba ki paidbah ki dei ki nongshong shnong ba pura jong ka Ri India hadien ba kila ioh ka hok ban thep vote bad ban jied ïaki nongmihkhmat bad ka jingthmu jong katei ka Special Summary Revision jong ki Electoral Rolls ka long ba kino kino ki nongshong shnong kiba la kot ïaka 18 snem ka rta kim dei ban shah ieh bad ba kidei ban pynrung kyrteng ïalade kumba kadei ka hok jong ki bad ka tarik ba khatduh ban pynmih ïaka Final Electoral Roll kan long haka 5 tarik Kylla Lyngkot 2024.