Jowai, Naiwieng 12: U Deputy Commissioner (Supply), West Jaiñtia Hills ula pyntip ba ïa u khaw rashon NFSA (AAY bad PHH) bad u Non-NFSA hapoh ka skhim PMGKAY na ka bynta u bnai Naiwieng, 2022 la dep ban pyllait sha baroh ki wholesale na ka bynta ban pynpoi sha baroh ki dukan die rashon hapoh ka District naduh ka 10 tarik u Naiwieng 2022 haduh ka 18 tarik Naiwieng 2022.
Ka bhah khaw Antyodaya Anna Yojna (AAY) yn sam ha ka jingthew kaba 35 kg kawei ka AAY FI Card ha ka dor T.3/- na ka bynta kiba shong ha sor bad ha nongkyndong.
Ka bhah khaw Priority Household (PHH) yn sam ha ka jingthew kaba 5 kg shi khlieh ha ka dor T.3/- na ka bynta kiba shong ha sor bad ha nongkyndong.Katba ïa ka bhah jong u khaw Non-NFSA kan long 7.215 kg shi khlieh ha ka dor kaba la buh da ki Vigilance Committee ka bym dei ban palat ia ka dor T.14/- shi kilo na ka bynta kiba ha sor bad nongkyndong.
Ïa u khaw PMGKAY- Antyodaya Anna Yojna (AAY) yn sam ha ka jingthew kaba 5 kg shi khlieh shi bnai khlem da donkam siew dor la ha sor na nongkyndong. Ïa u khaw Priority Household (PHH) yn sam ha ka jingthew kaba 5 kg shi khlieh shi bnai khlem da hap ban siew dor la ha sor ne nongkyndong.
U Deputy Commissioner (Supply) ula kyntu ïa baroh ki dukan die rashon (Fair Price Shop dealer) ba kin sam pyndep ïa u khaw hapoh ka 30 tarik u Naiwieng, 2022 da kaba pyndonkam da ka online e-Pos.
