La plie pyrda ïa ka ‘SFFT 2022’ bad ïa ka madan ïalehkai ha ka shnong Saitsnad, Mawlangwir

Mawkyrwat, Ïaïong, 21: U bah Banteidor Lyngdoh, Myntri jong ka tnad ka kam ïalehkai jong ka jylla Meghalaya, uba long kum u kongsan ha ryngkat u Myntri ka tnad umbam umdih jong ka Jylla Meghalaya, u bah Renikton Lyngdoh Tongkhar kum u symbud kongsan mynta ka sngi u la ïoh ban plie pyrda ïa ka lympung ïalehkai kynjatbol ba la tip kum ka ‘Spring Festival Football Tournament (SFFT) 2022’ ba la pynïaid da ka Mawlangwir Sports Club (MSC) ha madan Saitsnad, Mawlangwir, South West Khasi Hills District.
Ha kajuh hi ka sngi, u bah Banteidor Lyngdoh, u la ïoh ban plie ruh ïa ka madan ïalehkai kaba la dep ban shna pynbha ha kine ki khyndiat snem kiba la leit ha ka jingmang pisa kaba T. 396.11 laks.
Haba phai ha ka jingïalehkai, la ïoh ban pynïalehkai sdang ïa ka Se-la-jong Football Team pyrshah ïa ka Rangjadong Sports Club ha kaba ka Rangjadong SC ka khur ïa ka nam jingjop da 3 – 1 kol. Ha ka jingïalehkai jong ka kyllastep la ïoh ban pynkhih jar nyngkong eh da ka Se-la-jong FT lyngba ka penalty ba la kynjat da u Habamut Nongrum ha ka minit kaba 16, katba ka Rangjadong SC pat ka la ïoh ban pynnoh ha ka minit kaba 41 na u Shainborlang Khardewsaw bad kumjuh ruh ha ka minit kaba 44 na u Silvester Syiemlieh.
Ha ka jingïalehkai ha ka kyllamiet pat, mar shu sdang ka Rangjadong SC ka la ïoh ban ñion tiak ïa ka Se-la-jong FT bad ïoh syndon sa ïa ka kol kaba lai ha ka minit kaba 46 lyngba u Ïaidborlang Thongni bad lyngba kane ka kol la pynkhih ïa ka jingïalehkai ha kaba ka jingïaleh ka la sdang kham itynnad namar ka Se-la-jong FT ruh ka la hap ban ïa khun tyngeh ban ïoh ban pynphai ïa ki kol. Hynrei hapdeng jong ka jingïalehkai, ki ‘rangïalehkai ryngkat ki nongap kol ruh ki la hap ban ïa kyrda ïa ka ki jong ki jong, khnang ban ka kynhun kan poi sha ka thong jong ka jingjop bad tat haduh kaba kut jong ka jingïalehkai ka Rangjadong SC kam shym la ai lad shuh ïa ka Se-la-jong FT ba kan pynphai bad ka la kut noh da kaba ka Rangjadong SC ka la jop noh da 3 – 1 kol ïa ka Se-la-jong FT.
Ha ka jingïalang kaba lyngkot, u bah Banteidor Lyngdoh haba kren kum u kongsan ula ai ka jingkhublei kyrpang ïa ka Mawlangwir Sports Club kaba la lah ban lum ban lang ban biang sa shisien pynlong ïa kum kane ka lympung ïalehkai kynjatbol ban kyntiew ïa ki khun samla jong ka dong ka thaiñ. U la ong ruh ba khlem da leh klet, u ai ka burom ïa u (L) Rowel Lyngdoh, MLA barim jong ka Mawkyrwat Constituency namar dei lyngba jong u ba ka la pynlong ïa kane ka madan kaba i tynnad kumne kumba ka long mynta ba ki ‘rangïalehkai ki lah ban mih biang sha kane ka madan Saitsnad.
U ai ruh ïa ka jingïaroh ïa ki nongkitkam jong ka Mawlangwir Sports Club bad kumjuh ïa u nongpyntrei, ba da ka jingtreishitom jong ki ki la lah ban pynlong ïa kane ka madan kaba i tynnad shisha ha kaba ym ju ïohi kum kine ki madan kynjatbol ba da u phlang ba jyrngam kaba da i hun shisha, kaba paka bha kaba la ibit ruh ban pynlong ïa ki jingïalehkai na ka bynta ka State Level.
Ha kajuh ka por u la pynkynmaw ruh ba kane ka madan Saitsnad ha Shnong Mawlangwir ka dei kawei ka madan ïalehkai kaba la pynkhih win ïa ki paidbah ba ieid ïa ki kam ïalehkai ym tang hangne hapoh jong ka South West Khasi Hills District hynrei ha baroh kawei ka jylla da kaba pynlong ïa ki lympung ïalehkai kiba heh lyngba ka Mawlangwir Sports Club kaba la pynkhynñiuh ïa ka jylla baroh kawei, watla ha kito ki por kane ka madan ïalehkai ka long khoh-ruh khoh-ram ym kum mynta kaba la biang nadong shadong naduh ka madan, ki jaka khreh ki nongïalehkai bad haduh ki jaka shong ki nongpeit kai.
U la ong ba ngeit skhem ba lyngba kane ka madan kan long ka jingmyntoi shibun ïa ka shnong bad ïa ka Mawlangwir Sports Club ban kan nanglah ban pynlong shuh shuh ki lympung ïalehkai kiba heh da kaba khring shuh shuh ïa ki paidbah nongpeitkai bad ki nongïalehkai.
Ha ka jingkren jong u, u la kitbok kitrwiang ïa ki baroh ar tylli ki kynhun ba kin ïalehkai bha bad ha kajuh ka por ula kyntu ruh ïa baroh ki nongïalehkai ba kin kiar ïa ki kam ba sniew, na ka jingsngewsarong namar bunsien ynda ki khynnah ne ki samla ki la sdang ban kiew ha ki kam ïalehkai ki la kiew ruh ka jingsarong, kumta ki sa ngop noh tang shiteng por da ka ki shim noh da kawei pat ka lynti kiba khanglad na ka bynta ki kam ïalehkai. U la pynkynmaw ruh ba kum ki khun samla ne ki ‘rangïalehkai wat ju kyrkih ka leit ïing briew namar kane ruh ka long kawei na ki daw ban pyntlot ne pyntroiñ ïa ki ban kiew ha ki kam ïalehkai.
Haba ïa nujor bad kiwei ki jylla kum ka Manipur bad Mizoram, ka Meghalaya mynta ka la sdang duna ïa ki nongïalehkai kynjatbol ha ki Indian Super League (ISL), kumta dei ban trei shitom khnang ba kin nang pynmih shuh shuh ki nongïalehkai kiba tbit namar na ka liang ka Sorkar ka don ha syndah jong ki ha kino kino ki bynta, u la ong. “Ha ki kam ïalehkai ym ju don politic, ym ju don niam, ym ju don jaitbynriew hynrei ngi ïa long kawei”, ong u bah Banteidor.
Ula kyntu ïa ki samla ba kin trei shitom namar na ka liang ka sorkar ka la pynkhreh shibun ki bynta ban kyntiew ïa ki, ha ki kam ïalehkai bapher bapher, ki jingpynbiang ban pynïar ban tei ïa ki madan ïalehkai, ki stadium bad kiwei de ha nongbah Shillong bad kumjuh ruh kan ïaleh ban pynbiang ruh ha ki thaiñ nongkyndong namar shibun ki khynnah samla kiba paw ha ki kam ïa lehkai ki dei na Nongkyndong, da kaba um juh klet ïa ka South West Khasi Hills District ba ka dei kawei ka distrik kaba ju sei ïa ki nongïaleh kiba tbit kiba la wanrah nam ïa ka jylla baroh kawei khamtam ha kaba ïa dei ki nongmareh thong kiba jngai.
Namarkata, ngeit skhem ba ha ki snem ban wan na ka liang ka sorkar India ka don ka jingthmu ban pynlong ïa ka Khelo India bad ha Nongbah Shillong ruh ka la nang ïai pynkhreh bad kyrmen ba ka South West Khasi Hills District kan sa dei kawei ka jaka ban pynlong na ka bynta ka Khelo India. Kumta na ka liang jong u, un ïaid budien na ka bynta kane khnang ba kan long ka jingmyntoi na ka bynta ki paidbah bad ki samla kiba don sap ha ki kam ïalehkai. U la kitbok kitrwiang ïa ki samla nangne napoh jong ka South West Khasi Hills District ki ban sa leit ïashimbynta ha ka Meghalaya Game ban kin ïoh rah ïa ka nam jingjop kumba ki ju wanrah nam rah burom ha ka song ka thaiñ bad ïa ka jylla hi baroh kawei.
U Myntri ka tnad Umbam Umdih jong ka Jylla Meghalaya, bah Renikton Lyngdoh Tongkhar uba dei ruh u MLA jong ka Mawkyrwat Constituency u la ai ka jingpynshlur na ka bynta ki khun samla jong ka dong ka thaiñ ba kin shim kabu ïa ka kam ïalehkai la ha kano kano ka bynta namar ha kine ki sngi ki la don shibun ki samla kiba ïakam sorkar lyngba ka jingtbit jong ki ha ki kam ïalehkai.
“Katba dang biang ka por bad ka karta kum ki khun samla ki dei ban pynleit jingmut, pynshitom ïa lade lyngba ki jingkilanmet ha ki kam ïalehkai”, ong u bah Renikton bad kyntu ruh ba ki dei ban kiar na ki jingmlien kiba sniew kum ka bam ka dih sngewbha, ki dei ban long kiba phikir ïa lade bad im ka jingim kaba bha khnang ba ka lawei bad ka jingthmu jong ki ban kiew ha ka kam ïalehkai kan long kaba jop.
Shuh shuh u la pynpaw ruh ka jingaikhublei na ka bynta ka Mawlangwir Sports Club kaba la pynlong ïa kane ka lympung ïalehkai kynjatbol kaba long shi bynta jong ka jingwanrah ïa ka jingïajan bad jingïalong kawei jong ki ‘rangïalehkai, namar khlem ka jingïalong kawei kan nym poi ka thong jong ka jingjop.
Kiba ïadonlang ki long naduh u District Sports Officer, South West Khasi Hills District, bah D. Synkon, u SDO ba la shongthait jong ka Ranikor Civil Sub, bah H.S. Diengdoh, MCS, u bah Sounder Cajee, u Myntri jong ka shnong Mawlangwir, u bah N.S. Wanniang, ki nongkitkam jong ka Mawlangwir Sports Club bad kiwei kiwei ki riew rangbah jong ka dong ka thaiñ.
La pynshongshit da ka jingrwai na ka Ïonglajong Musical & Cultural Organisation (IM&CO) bad ka jingshad tynrai na ka Ri Maram Folk Academy.