Mawkyrwat, Naitung 29 : Ka Pynden-Mawthawïang Sport Club ha ka sngi ba ar jong ka taïew ka la ïoh ban plie pyrda noh ïa ka lympung ïalehkai kynjatbol ba la tip kum ka Knockout Football Tournament (KFT) 2022 ha kaba u bah H.S. Diengdoh ophisar ba la shnongthait u la long kum u kongsan bad ha kajuh ka por uba dei ruh kum u kyrtong u ban sa ïa aireng ha kane ka elekshon 2023 na ka NPP jong ka Mawkyrwat Constituency.
Ha kane ka sngi sdang la ïoh ban pynïalehkai da ka Shngimawleiñ Sports Club pyrshah ïa ka Pharmahïong Sports Club bad ka Domdipei Sports Club pyrshah ïa ka Umsaw-domrisai Sports Club.
U bah H.S. Diengdoh kum u kongsah ha kaba kren ha ka jingïalang u la ai mynsiem ïa ki nongpynïaid jong ka Mawthawiang Sports Club bad ïa ki rangbah shnong ba ki la lah ban pynlong kum ïa kine ki lympung ïalehkai ba ha ki juk ba mynta ym ba ka dei tang ka kam kamai pisa jong ki nongpynïaid hynrei ka dei na ka bynta kumno ban lum ban lang ïa ki para marjan marpa ba kin ïa sngewieid sngewjan kum shipara ban ïoh ïa kynduh ha ka lympung bad kaba kordor tam ka long ba kin ïoh ïa ka met kaba koid ba khiah lyngba ka jingïoh ban kilanmet bad kumjuh ruh ha kum kine ki lympung ïalehkai ka jingmyntoi ban kyntiew ïa ki samla ha ki kam ïoh kam ïoh jam.
U la ban jur ba kum ki nongïalehkai kaba donkam tam ka long ba haba ki ïalehkai kynjatbol ki dei ban don ïa ka akor ka burom bad ka jingkitkhieh ïa lade, lada ki duhnoh ïa ka akor bad ka burom kin nym poi sha ei sha ei ruh. U la pynkynmaw ruh ba ha ki juk ba mynta ki kam ïalehkai kim dei shuh ki kam ban ïalehkai sngewbha ne ïaleh tamasa hynrei kiba bun ki nongïalehkai na kane ka dong ka thaiñ jong ngi ban ïa nujor bad kiwei de ki distrik ki la lah ban ïashimbynta wat shabar jong ka distrik ne wat ha ka jylla Meghalaya wat shaduh shabar ruh ba ki la long hi kumjuh.
“Kane dei kawei ki lad ki kabu ïa ki samla jong ka dong ka thaiñ ba kin ïoh ban pyni ïa ki sap ki talen ki jong ki khnang ba kan long ruh kum kawei ka lad ba kin ïoh kamai jakpoh ïa ki ha ki kam ïalehkai bad ruh kan long kum kawei ka lad ka kabu ban ïoh kam ïoh jam na ka bynta ki khun samla lada ma ki hi ki trei shitom ha kiba bun ki bynta ha ki kam ïalekai”, ong u bah Diengdoh.
Ha kajuh hi ka sngi na ka liang u bah H.S. Diengdoh u la ïoh ruh ban ai jingïarap da ka song pisa kum shibynta ban ai mynsiem bad ai ka jingkyrshan lem ïa ki samla ha kane ka lympung ïalehkai ha kajuh ka por kum u ophisar ba la shongthait um pat sngewhun ban ban shu kut noh tang ha ka kam sorkar hynrei u da thmu ruh ban bteng biang ha ki kam shakri paidbah ban ïa aireng ha kane ka MLA Election 2023 na ka National People Party (NPP) na ka Mawkyrwat Constituency ngeit skhem ba lada ki paidbah jong ka dong ka thaiñ ki ibit ïa u ba kin pynjop don burom ïa u kum u MLA shibun ki jingkylla ha ka roi ka par ha kiba bun ki bynta hapoh jong ka Mawkywat Constituency.
Ha kane ka sngi la ïa don ryngkat ruh u Myntri Shnong, bah Humly Lyngdoh, bah Skhem Ramsiej, bah Lamphrangton Lyngkhoi bad kiwei de ki ‘riew rangbah bad ki paidbah kiba la wan ban sakhie lang ha kane ka sngi la ïoh ruh ki jingkren lyngkot na u Myntri Shnong bad na u Secretary jong ka Pynden-Mawthawïang Sports Club.
