Mawkyrwat, Ïaïong 13: Ka Rympei PIP Football Team, Shillong mynta ka sngi ka long ka nongjop hadien ba ka pynliem noh da 2 – 1 kol pyrshah ïa ka South West Khasi Hills District Police Football Team ha ka sngi plie pyrda ïa ka lympung ïalehkai kynjatbol ba la tip kum ka 2nd Above 40 Football Tournament 2022 ba la pynïaid da ka Veterans Committee jong ka Mawten Sports Club (MSC) ha madan Mawpyllun, Mawten, South West Khasi Hills District.
Lah ban pynkynmaw ba ka jingthmu jong kane ka lympung ïalehkai jong kiba la palat ïa ka 40 snem ka long ban pynkhie im biang bad ailad ïa ki ba kin ïoh ban pynkhih ne kilanmet biang sa shisien na ka bynta kito ki ‘rangïalehkai kiba la shongthait na kane ka kam ïalehkai kynjatbol la bun bun snem, bad lyngba kane ka lympung kan pynktik biang ïa ki jingmut jingpyrkhat jong ki, ba kin ïoh biang ka lad ban mih sha madan ban pyni ïa ki sap ki phong ba ki don.
Ïa katei ka lympung ïalehkai kynjatbol ka 2nd Above 40 Football Tournament 2022 la wan ban plie pyrda da u bah W. Sangriang, uwei na ki ‘riew rangbah ka dong ka thaiñ uba long kum u kongsan.
Ha ka jingkren jong u la pynpaw ka jingsngewnguh bad ai khublei kaba kyrpang ïa ka Mawten Sports Club kaba la pynlong kum ïa kine ki lympung ïalehkai na ka bynta ki Rangbah kiba la kynjoh ïa ka karta kaba 40 snem bad kane ka long kawei ka lad ban ai lad biang sa shisien ïa ki ba kin ïoh ban mih biang sha madan ban ïa pyni ïa ki sap ki phong ba ki ki don watla hapdeng jong ka jingnang noh ar sut jong ka met ka phat.
Ha kajuh ka por u la pynpaw ka jingaikhublei kitbok kitrwiang na ka bynta baroh ki kynhun kiba wan ïashimbynta ha kane ka lympung ïalehkai kynjatbol ba kin nang ïalehkai bha ha kine ki sngi ki ban sa wan namar kum ka ju long ba hapdeng jong ka jingïakhun ka don beit ka kynhun kaba jop bad kaba shah rem. Namarkata, kaba shah rem kam dei ban duh mynsiem hynrei kan dang ïakhun ban jop ha kawei pat ka por bad kaba jop ruh kam dei ban sngewsarong hynrei kan dang ïai ïalehkai bha shuh shuh ha ki sngi ki ban dang wan.Kiba la wan ban ïa shimbynta ha kane ka 2nd Above 40 Football Tournament 2022 ki don baroh 16 tylli ki kynhun kiba dei napoh jong ka distrik bad nabar distrik.
