Mawkyrwat, Jylliew 27: Ka ophis jong u District Sports Officer, South West Khasi Hills District, Mawkyrwat mynta ka sngi ka la ïoh ban plie pyrda ïa ka lympung ïalehkai kynjatbol ba la tip kum ka South West Khasi Hills District Level Inter-School Subroto Mukharjee Cup Football Tournament 2022 hapoh madan Pyndenïewlyngdoh, Nonglang, South West Khasi Hills District.
Haba phai ha ka jingïalehkai kaba nyngkong hapdeng ka Lyngdoh Wanniang Secondary School, Marshillong bad ka Phlo Rosy Secondary School, Nonglang ha kaba Lyngdoh Wanniang SSM ka la jop da 3 – 0 kol. Ïa ka kol kaba nyngkong la ïoh ban thep ha ka minit kaba 11 lyngba u Mebanlam Lyngdoh, kaba ar ha ka minit kaba 41 na u Sanborlana Lyngkhoi bad kaba lai ha ka minit kaba 60 na u Dapborlin Lyngdoh.
Nangta ka Jingïaseng Kynthei Mawkyrwat Presbytery Higher Secondary School, Mawkyrwat (JKMPHSSM) ka la jop da 4 – 1 kol ïa ka Ten Set Secondary School, Sakwang. Ïa ki kol jong ka JKMPHSSM la ïoh ban thep da Batskhemlang Thongnirit ha ka minit kaba 19, 38, bad 56 bad kumjuh ruh na u Meban Lyngdoh ha ka minit kaba 58 bad ïa ka kol jong ka Ten Set Secondary School, Sakwang la ïoh ban thep da u Aiborlang Kharjahrin.
Shuh shuh ka Horirai Memorial Higher Secondary School, Photjaud-Rangthong pat ka la jop da 5 – 0 kol pyrshah ïa ka Marshillong Presbyterian Secondary School. Katba ka Balang Mawlangwir Higher Secondary School (BMHSS) ka la jop da 3 – 0 kol pyrshah ïa ka St. John Bosco Secondary School, ha kaba ïa ki kol jong ka BMHSS la thep da u Aiboklang Jyrwa ja ka minit kaba 40, na u Iaiskhemlang Jyrwa ha ka minit kaba 46 bad na u Welshar Paliar ha ka minit kaba 57.
Ïa kane ka lympung ïalehkai kynjatbol la plie pyrda da u bah Damang Syngkon, District Sports Officer, South West Khasi Hills District ha ryngkat ka jingïadonlang jong ki nonghikai skul bad kumjuh ruh ki khynnah skul kiba wan ïashimbynta ha kane ka lympung.
Ha kane ka South West Khasi Hills District Level Inter-School Subroto Mukharjee Cup Football Tournament 2022 la wan ïashimbynta haduh 41 kynhun kata kiba hapoh 17 snem jong ki shynrang ki don 17 kynhun, kiba hapoh 14 snem jong ki shynrang ki don 13 kynhun bad kiba hapoh 17 snem jong ki khynnah kynthei ki don 11 kynhun.
