La plie pyrda ïa ka 8th South West Khasi Hills District Level Inter-School Athletic Meet 2022 ha madan Saitsnad

Mawkyrwat, Jymmang, 11: Ka ophis jong u District Sports Officer (DSO), South West Khasi Hills District mynta ka sngi wat hapdeng u slap u ba jur ka la ïoh ban plie pyrda ïa ka 8th South West Khasi Hills District Level Inter-School Athletic Meet (SWKHDLI-SAM) 2022 hapoh madan Saitsnad Mawlangwir, South West Khasi Hills District ha kaba ka kong Caramai Kharkongngor, IAS, Deputy Commissioner, South West Khasi Hills District ka long kum ka kongsan.
Lah ban kdew ba ha kane ka Inter School Athletic Meet jong u snem 2022 la pynlong da ka ophis jong u District Sports Officer, Mawkyrwat ha kaba ki 9 tylli ki skul ki la ïashimbynta. Ha kane ka sngi plie pyrda la wan sakhi lang ruh naduh ki ophisar sorkar, ki nonghikai bad kumjuh ruh ki khynnah skul kiba long ki nongai mynsiem ïa la ki jong ki nongïashimbynta ha ki jait jingïalehkai bapher bapher.
Ka kongsan, kong Kharkongngor haba kren ha ka jingïalang ka la pynpaw ïa ka jingkmen ban ïohi ba ki khynnah skul ki la ïashim bynta da ka jingshitrhem khlem salia wat hapdeng ka jingpynthut jong u lapbah bad dei kum kane ka jinglong kaba ngi donkam ha kano ma kano kaba ngi leh manla ka sngi ha ka jingim. Ka la ong ba ka kam ïalehkai ka long kaba donkam kumba long ka jingnang jingstad lada ki nang ban pyndonkam ha ka rukom kaba dei.
Shuh shuh ka la ong ba kim dei ban shim ïa ka kam ïalehkai tang kum ka lad jingkilanmet ne ka jingïalehkai pynbyrngia hynrei ban shim ïa ka kum ka lad ïohkam ïoh jam ka ban kyntiew ïa ka jingim. Ka la ong ruh ba ha kane ka juk jingstad teknoloji mynta ki lah ban ïohi ïa ki jingïalehkai sports lyngba ki telivision bad ki mobile phones. Ka la bynrap shuh shuh ba ka long ka jingsarong ïa kane ka dong ka thaiñ ha kaba ki khynnah jong kane ka South West Khasi Hills District ki la wanrah ka nam ka burom ha Meghalaya Games 2022 ba dang shu dep shen ha Nongbah Shillong bad kane ka pyni ba ki lah ban nang kiew bad poi kham shakhmat lada ki ïoh ki jinghikai kiba biang.
Namarkata, ka la pynshlur ïa ki khynnah ban shim ïa ka kam ïalehkai kum ka lad ïoh kam ïoh jam ne lad kamai jakpoh bad ban long kiba tista, kiba phikir bad kiba ïaid beit ïaid ryntih ha baroh ki liang da kaba kiar na ki jinglong bad ki jingmlien kiba sniew ki ban pynthut pyndkoh ïa ka lawei jong ki. Haba ka la ban jur ïa ka jingjur jong kiba bun ki kam sniew namar ka jingpyndonkam ïa ki drugs bad kiwei ki jingdih pynbuaid, ka la sneng la kyntu ïa ki khynnah ban kiar na kiei kiei ki ban pynsniew ïa ka met, ki jingmut jingpyrkhat bad ïa ka lawei jong ki hynrei ban pynmlien ha ka jingkilan met ne kiwei pat ki jingïalehkai ki ban ïalam ïa ki sha ka lynti ka jingbha bad ha kajuh ka por ka ban tei ïa ka met ka phad, ki jingmut jingpyrkhat babha bad ka lawei kaba dap ba biang da kaba kyntu ïa ki ban long kiba phikir, kiba tista namar kine ki jinglong babha kin ïarap ban kyntiew ïa ki ha ka jingim. Ka la ban jur ruh halor ka jingdonkam ban don ka mynsiem ban ïakhun ha baroh kiei kiei ba ki thmu ha ka jingim namar khlem kane ka mynsiem ïa khun kin ym lah ban long ei ei ne ïoh ïa kaei kaba ki thmu ha ka jingim.
Haba kdew bad pyni ruh ba ka jingnang jingstad ka long kaba donkam bha bad kordor tam ha ka jingim jong ki briew ka da pynkynmaw ruh ba kum ki khynnah skul ki don shibun ki kamram ba ki hap ban pyndep man la ka sngi da kaba kyntu ïa ki ban minot thop bad ban trei shitom na ka bynta ban ïoh kheit ïa u soh uba thiang bad ban ïa noh synñiang lem sha ka imlang sahlang bad ban tei ïa ka lawei kaba phyrnai. Hadien kane ka la kyntiew ïa ka lama bad ka la pynbna ba la plie ïa kane ka ‘Inter School Athletic Meet 2022’.
Kham ha shwa u bah Damang Syngkon, District Sports Officer jong ka South West Khasi Hills District ha ka jingkren ai ïa ki kyntien pdiang sngewbha u la ïathuh ruh ba ha kane ka Meghalaya Games 2022 ba dang shu dep shen ha Nongbah Shillong ki nongïamareh na kane ka dong ka thaiñ ki la wanrah haduh kumba 11 tylli ki takma ksiar, 6 ki takma rupa bad 8 ki takma rnong kaba long ka jingjop bad ka burom ïa ka South West Khasi Hills District baroh kawei.
Ha shwa ka jingïalehkai ka la don ruh ka jingpynsmai ïa baroh ki team kiba ïashimbynta.
Ha kajuh hi ka sngi hadien ba la ïoh ban pyndep ïa ki katto katne ki jait jingïalehkai, la ïoh ruh ban sam ïa ki khusnam nongjop ha ka Shot-Put kata sha u Gideon Lyngdoh Marshilong jong ka Nativity Higher Secondary School, Mawkyrwat (jingjngai 9.72), u Babystar Jyrwa jong ka Jakrem Presbyterian Secondary School (jingjngai 7.91) bad sha u Damebanjop Lyngdoh jong ka Maharam Government Higher Secondary School, Mawkyrwat (jingjngai 7.41) kiba dei jong ki shynrang kiba 18 snem katba jong kiba 16 snem pat ki u Deibanjop Syiemlieh jong ka Rising Secondary School, Sohkhyllam (jingjngai 8.09), u Skhemborlang Kharlyngdoh jong ka Nativity Higher Secondary School, Mawkyrwat (jingjngai 8.00) bad u Arboklang Syiemlieh jong ka JNV South West Khasi Hills District (jingjngai 7.41).
Ki nongjop ha ka Javelin Throw jong ki khynnah kynthei kiba 16 snem ki long ka Badashisha Nongrem (jingjngai 19.73), ka Emisha Kharraswai (jingjngai 18.65) kine ki dei jong ka Nonglang Secondary School bad ka Laniewkorlang Kharraswai jong ka Jakrem Presbyterian Higher Secondary School (jingjngai 15.58) katba jong kiba dei ha ka 18 snem pat ki long ka Ribansha Lyngkhoi jong ka Jakrem Presbyterian Higher Secondary School (jingjngai 15.63), ka Gracymary Nongrem jong ka Sakwang Presbyterian Higher Secondary School (jingjngai 13.87) bad ka Lawanshisha Marweiñ jong ka Nativity Higher Secondary School, Mawkyrwat (jingjngai 13.07).