Mawkyrwat, Naiwieng 17 : Ka All Meghalaya Trinamool Congress (AMTC) jong ka Mawkyrwat Block Riwar Zone mynta ka sngi ka la ïoh ban plie pyrda ïa ka lympung ïalehkai volleyball ba la tip kum ka 1st Rowell Lyngdoh Memorial Volleyball Tournament 2022 ha madan jong ka Shnong Tynnai, South West Khasi Hills District.
Ka jingthmu jong kane ka lympung ïalehkai ka long ban teh-song-lang ïa ki samla jong ka dong ka thaiñ ri war ba kin don ka jingïalang kawei bad long shitylli ha ki kam ïalehkai bad kumjuh ruh ban kyntiew ïa ka kam ïalehkai volleyball ha ki samla bad kawei pat ka long ban pyni-thuh ha ki ba ka party TMC jong ka Mawkyrwat Block kan don ïa la u jong u kyrtong ban ïa khun ïa kane ka MLA Election 2023.
Ka jingïakhun ka long hapdeng ka Tynnai Sports Club bad ka Jerlang Sports Club. Haba phai ha ka jingïoh poiñ, ha ka set ba nyngkong ka Tynnai SC ka la ïoh 25 set bad Jerlang SC 19 set, ha ka set kaba ar ka Tynnai SC ka la ïoh 23 set bad ka Jerlang SC ka la ïoh 25 bad ha ka wad kaba khadduh pat ka Tynnai SC ka la ïoh 13 katba ka Jerlang SC ka la ïoh 24. Namarkata, ha kaba kut jong ka jingïalang ka Jerlang SC ka jop da 2 – 1 set pyrshah ïa ka Tynnai SC.
Lah ban kdew ba ki don haduh 17 tylli ki kynhun kiba la wan ïashimbynta ha kane ka 1st Rowell Lyngdoh Memorial Volleyball Tournament 2022.
U kongsan ha kane ka sngi u bah Mebadonnam Saiborne u khun jong u bah Sounder Strong Cajee u kyrtong ka TMC Mawkyrwat Constituency haba kren ha ka jingïalang u la pynpaw ka jingkhublei na ka bynta ki khun samla jong ka dong ka thaiñ Riwar kiba la ïa mih shakhmat ban wan ïashimbynta ha kane ka lympung ïalehkai volleyball ba la pynlong da ka All Meghalaya Trinamool Congress (AMTC) jong ka Mawkyrwat Block Riwar Zone ha kaba kane ka long kum shibynta ban pynsah jingkynmaw ïa ka jingkhlad noh jong uwei na ki ‘riew rangbah jong ka dong ka thaiñ u (L) Rowell Lyngdoh uba la long MLA barim jong ka Mawkyrwat Constituency bad u ba la bat teng kum u Symbud Myntri Rangbah jong ka Jylla Meghalaya ha ki snem kiba la leit noh.
Haba kren ai mynsiem na ka bynta ki ‘rangïalehkai jong ka dong ka thaiñ riwar, u la ong ba hooid kine ki thaiñ ki long kiba mlien bha ha ka bynta ban ïalehkai, hynrei ki kham shim kham kyrpang ba ka jingïalehkai volleyball ka dei kawei ka jingïalehkai ba ki ju sngewtynnad. Namarkata, u bah Mebadonnam Saiborne u la ong ba kum ki ‘rangïalehkai ki dei ban long ki nongïalehkai da ka mynsiem jong ka jingaiti lut bad ïaleh da ka mynsiem jong ka jingkmen bad pyndonkam ruh ïa ka sap ba ki ki don khnang ba kin nangkiew na kawei ka por sha kawei pat bad ym ba kin kut tang hapoh la ki shnong hynrei kin ïoh ban mihkhmat ruh sha kiwei de ki jaka namar ka jingïalehkai ha kine ki sngi kam dei shuh tang ka jingïaleh pynbyrngia hynrei ka la dei ruh ka lad ban pynim jakpoh.
La pynshit pynshngaiñ ïa kane ka lympung ïalehkai da ka drama lyngkot na ka NKD Wann’z YouTube Channel.
Ïa ka jingïalang la pynïaid da u bah Remdor Shylla, General Secretary ka Mawkyrwat Constituency Socio Economical & Political Awareness Committee (MCSEPAC) bad ki jingkren lyngkot na u bah Polyboy Marweiñ, President ka TMC Pynnoh Riwar Zone, ha ryngkat ka jingïadonlang jong ki ‘riew rangbah jong ka dong ka thaiñ Ri War kiba dei ki shnong hapoh jong ka South West Khasi Hills District.
