Mawkyrwat, ‘Naitung 26: Ka South West Khasi Hills District Badminton Association (SWKHDBA) ka la plie pyrda ïa ka lympung ïalehkai badminton kaba la tip kum ka 10th South West Khasi Hills District Badminton Championship 2024 ha Indoor Stadium Mawkyrwat, Mawlangwir, South West Khasi Hills District.
Mynta ka kynti ki nong-ïashimbynta ka la kynjoh haduh 90 ngut, kynthup ïa ki shynrang bad kynthei naduh ka karta ba 13, 15, 17, 19 snem bad kynthup ha ka open category.
U kongsan ha kane ka sngi u dei u bah F.D. Ramsiej u ba la aikhublei ïa ka SWKHDBA kaba la pynlong ïa kum kane ka jait jingïalehkai kum shibynta ban sei ïa ki ‘rang bad ki ‘thei ïalehkai badminton hapoh ka distrik namar ba kane ka lympung ka dei shibynta ban jied ïa ki nongïalehkai ba tbit khnang ba kin ïoh ka lad ban leit ïa shimbynta ha ka State Level.
Namarkata, u la ai mynsiem ïa ki nongïalehkai ba haba ki ïalehkai ki dei ban ïaleh da ka mynsiem jong ka jingkut jingmut khnang ba ka jingthmu jong ki kan urlong namar lada ki ïalehkai tang ban shu pyndep ïa ka kamram kam don jingmut bad ka jingkwah jong ki ruh ban poi ha kiwei de ki jaka kan long leh noh ei.
Shuh shuh ha ka jingkren jong u u la kyntu ruh ba lada ki kwah ban poi sha ka thong jong ka jingjop bad ïoh ban poi ha kiwei de ki kyrdan ha ka jingïalehkai badminton ki dei ban peit ruh ka nuksa ïa ka jingleh ne jingkilanmet jong ki ‘rang bad ki ‘thei ïalehkai badminton jong ka ri India da kaba kin long kiba ryntih ne discipline ha baroh ki liang naduh ka bam ka dih, ka akor ka burom bad kiwei de ki bynta jong ki nongïalehkai ki dei ban leh.
U bah H.S. Diengdoh, President ka South West Khasi Hills District Badminton Association haba ai jingkren u la ong ba wat hapdeng ki jingïalynti kiba eh ban pyntyllun ïa ka kam hynrei kim shym la kynran dien noh pynban ki dang ïai pyntyllun ïa ka ban pynlong ïa ki jingïalehkai bapher bapher ha kaba kane wat ba mynta ka dei ka sien ba shiphew (10). “Ka jingpynlong jong ngi ka Association ïa kum kine ki jait jingïalehkai ka long ban hikai ïa ki khynnah ba kin pynmlien ïa ki kam ïalehkai khnang ba kin lait na shibun ki jingsniew bad ka long ruh kawei ka lad ban btin lynti ïa ki ba kin nang kiew ha ki kam ïalehkai”, ong u bah Diengdoh.
Ymtang kata, u la ong ruh ba kane ka lympung ka dei ruh shibynta ban jied ïa ki ‘rang bad ki ‘thei ïalehkai badminton ba lada ki jop nangne kin sa leit ban mihkhmat sa ha ka State Level ka ban sa long ha u bnai Nailar, 2024. “Kane ka lympung ïalehkai ym tang ba ka long ba kin nang ban ïalehkai hynrei ban hikai ruh ïa ki ïa ka burom ka akor khnang ba kin tip kumno ban leh haba ki don hapoh ka jingpynïaid jong ki nongïalam”, u la ong.
U la ong ruh ba kum ka association ka don ka jingthrang ba la kumno kumno ka sorkar ka dei ban thaw lad thaw lynti lem ban shna ïa ka Indoor Stadium jong ka jingïalehkai badminton kaba don la kumno kumno lai tylli ki jaka ïalehkai khnang ba kan long ka jingïarap ïa ki nongïalehkai.
Ha kawei pat ka liang u la ai mynsiem na ka bynta ki kmie ki kpa ruh ba lada ki ïoh ba ki khun ki don jingtbit ha ki kam ïalehkai ai lad lem ïa ki khnang ba kin lah ban pyndonkam hok ïa ka sap ba ki ki don da kaba kum ki kmie ki kpa kin hikai ïa ki khun ba ki nang ruh ban bate ïa ka por khnang ba kan nym long kaba sep ei ïa ki khun bad kan long ruh ka jingmyntoi ïa ki ha ka la shai la shi sngi.
Kiwei de kiba la ïadonlang ki long u bah R.R. Lyngkhoi, Myntri Shnong Mawkyrwat, ki ‘rang bad ki ‘thei ïalehkai, ki dkhot jong ka association lem bad kiwei de ki rangbah kiba la shah khot sngewbha.
