La plie paidbah ïa ka Sunset View Restaurant ha Pdeiñ Mookhim Tourist Spot, Wahïajer

Jowai, Naiwieng 10 : Shi bynta ban khring ïa ki nongwan jngohkai pyrthei haka jaka kaba don ha Pdeiñ Mookhim Tourist Spot (Viewpoint) Wahïajer West Jaiñtia Hills District, la plie paidbah ïa kawei ka dukan kaba la tip kum ka ‘Sunset View Restaurant’.
La wan ban ai mynsiem lang ha kane ka sngi da u Symbud Myntri Rangbah ka jylla u ma Sniawbhalang Dhar, uba la plie paidbah ruh ïa kane ka dukan bam haka juh ka por ula kyrkhu kyrdoh ïa u trai jong kane ka dukan.
U ma Sniawbha ula ai ka jingïaroh ïa utei u samla uba la lah ban seng ïa ka kam la jong ban kyntiew ïa ka ïoh ka kot jong ka thaiñ. Ula pynshlur ruh ïa kiwei de ki khun samla ban shim ïa kum kine ki sienjam ym tang ban ïoh kam, hynrei kan kyntiew ruh ïa ka kam jngohkai pyrthei ha kane ka thaiñ.
Ka Sunset View Restaurant kaba don ha katei ka jaka ba itynnad kala ïarap ïa ki nongwan jngohkai ban ïohi ïa ka sngi kaba sep ha ryngkat ka jingmad ïaki jingbam tynrai kiba la shet kyrpang.
La pynsngew ruh ba kane ka jaka la khmih lynti ba kan long ka jaka kaba pawnam na ka bynta ki nong jngohkai pyrthei kiba wan jngoh ïa ka Wahiajer bad ïa ki jaka ba marjan. Ha kane ka sngi plie la wan ban donlang da ki nongïalam ka thaiñ, ki nongshong shnong bad ki seng samla kiba la ïaroh ïaka jingpyrshang jong une u samla.