Shillong, Lber 25 : Mynta ka sngi u Myntri ka tnad Textiles u bah Banteidor Lyngdoh u la plie ïa ka jaka thaiñ jaiñ ryndia bad muka kaba la tip kum ka Muga Growing cum Handloom Centre ha Saikarap, Shella ha ka jingïadon lang u MLA ka Shella u bah B Synrem, u Commissioner Secretary u bah F.R Kharkongor, Secretary C &RD, ki ophisar, ki dkhot ka Khneng Weavers and Embroiderers bad kane ka long kum shibynta na ka jingrakhe ïa ka jingdap 50 snem ka jylla Meghalaya.
La ïoh ruh ïa ka jingpyni ïa ki riam tynrai ki nong Shella ba la pynwandur itynnad da ka Khneng Embroidery bad kiba la thaiñ da ki nong Mustoh.
U Myntri lem bad kiwei kiba ai jingkren ki la ai ka jingïaroh ïa ki jaiñ Muka bad ki kam ba ka Khneng ka pyrshang ban kyntiew shaphrang ïa kane ka kam ha katei ka thaiñ hi baroh kawei. Da ka jingplie ïa kane ka jaka kan dang ïarap shuh shuh ïa ki briew na katei ka thaiñ ban ïoh pynkhlaiñ ïa ka jingpynmih ïa kitei ki jaiñ ba thaiñ hi namar kane ka Muga Growing cum Handloom Production Centre kan ïarap ym tang ïa ka thaiñ Saikarap, Mustoh hynrei ïa ka Shella hi baroh kawei.
