La plie ïa u mot sah kynmaw jong u (L) Maieit Hopingstone Lyngdoh ha Mawphanlur

Nongstoiñ, Nailur 26: Kum ka dak ka jingkynmaw burom ïa ka lyngkhuh snem ba hynñiew jong ka jingkhlad noh jong u (L) Bah Hopingstone Lyngdoh, u nongseng jong ka Hill State People Democratic Party (HSPDP), mynta u snem ka party ka la shim ïa ka sien jam kaba khraw na ka bynta ban pynsah ïa ka nam bad ka kyrteng jong u, da kaba tei ïa u mot sah jingkynmaw ha kliar jong uwei u lum u ba itynnad bha ha Mawphanlur.
Ïa utei u mot la plie mynta ka sngi da bah K.P.Pangñiang president rangbah ka party, ha ryngkat ka jingïadon lang jong ki trai khyndew kiba la ai sngewbha ïa katei ka jaka, kiba ha?ing hasem jong u (L) bah Hopingstone Lyngdoh, ki khun pyrsa trai ba kynthup ïa u bah Danielstone Lyngdoh Nonglait, ka kong Badariti Lyngdoh Nonglait bad kiwei kiwei.
Kiwei kiba la ïadon ryngkat ki long u bah Panbor Ryntathiang, bah Primson Makdoh kyrtong ka HSPDP na Umsning constituency, bah Methodius Dkhar kyrtong ka HSPDP na Mawshynrut constituency, bah Shakliar Warjri kyrtong HSPDP Mawthadraishan constituency, bah Martle Mukhim MDC ka Mawkynrew constituency, bah Robertjune Kharjahrin President rangbah ka HYC seng kmie, ki nongshong shnong katei ka thaiñ ryngkat ki paitbah na kylleng ki jaka kiba la wan ban sakhi lang.
Ha kane ka sngi wat hapdeng jong ka jingpynthut jong u slap, la plie ïa utei u mot bad hadien ba la plie la pynlong ka jingïalang ha kaba la pynphuh pynphieng da ki nongrwai sur tynrai kiba la wan na ka Musical Institute Nongstoiñ college bad kiwei kiwei.
La pynïaid ïa ka jingïalang da u bah Bony Lyngdoh Lyngkhoi president ka HSPDP Rambrai Jyrngam constituency Youth wing bad na ka liang ka Kur Lyngdoh Nonglait, la ïoh ïa ka jingkren na ka kong Badariti Lyngdoh Nonglait, ha kaba ka la pynkynmaw ïa ki jinghikai bad ki jingsneng jingkraw jong u kñi jong ka ïa ka kur ka jait bad ïa ki nongshong shnong. Ka kong Bada ka la pynkynmaw ruh ba u (L) bah Hopingstone Lyngdoh haman la ki jingthoh kiba u buh u ju thoh ïa kine ki kyntien ‘Iaid hok bad ïaineh’.
U bah Danielstone Lyngdoh Nonglait haba ai jingkren, u la pynkynmaw ba naduh ba u dang khynnah u la ju don ha kti ha kjat jong u kñi u (L) bah Hopingstone bad wat haduh ka por ba u leit pule ruh, dei u kñi u ba la ai mynsiem bad kyrshan borbah haduh ba un da poi sha ka kyrdan kum u nongsaid aiñ.
U bah Robertjune Kharjahrin president ka HYC sengkmie, u la ong ba lada kam dei na ka jingïalam jong u (L) bah Hopingstone Lyngdoh, ym shym la ïalam ban ïakhih bad dawa ïa ka jylla ba pura haduh mynta bad ym don jingartatien ba ka jaidbynriew ka la hap ban kren da ka ktien Assamese. U la ong ruh ba ki paitbah ka jylla ki la dei ban kynmaw ba phai dien sha ki kam kiba utei u nongïalam jong ka jaitbyriew u la hikai.
Nalor kata u la ong ba ka bun ki briew ki ju kren beiñ ïa u bah Hoping bad ki sien kyrteng ïa u kum u 12 A, namar ba na ka por sha ka por u ju dawa ba dei ban weng noh ïa katei ka kyndon na ki kyndon jong ka Sith Sechedule. Hynrei na ka daw jong ka jingbym ai jingkyrshan lang jong ki para nongïalam, um shym la lah ban pynurlong. Dei na kata ka daw ba ka sorkar India ka dang lah ban khang ban tih ïa ki marpoh khyndew kum u dewïong, mawshun bad kiwei kiwei.
U bah K.P.Pangñiang haba ai jingkren, u la ong ba ka jingtei ïa u mot sah jingkynmaw ïa u (L) Maieit Hopingstone Lyngdoh ha katei ka jaka, ka long namar ba ka party kam sngew dei ban klet ïa u nongïalam u ba la len lade na ka bynta ka ïap ka im jong ka jaitbynrirew.
Nalor kata u la ong ruh ba ki matti jong u (L) maieit Hoping kiba u la buh hakhmat ka jaitbynriew, ki dei ki dak ki shim ba ka jaitbynriew ka hap ban buddien, namar ka jaitbynriew kaba klet ïa ki matti ba la hikai bad buh da ki longshuwa, ka dei ka jaitbynriew ka bym ieit ïa la ka jong ka kynja bad ka jait ka khong.