Mawkyrwat, Jylliew, 20: Ka Mawkyrwat District Sports Association (MDSA) ha ryngkat ka jingïasnohktilang bad ka District Sports Officer (DSO), South West Khasi Hills District mynta ka sngi ka 20 tarik u Jylliew, 2022 ka la ïoh ban plie pyrda ïa ka lympung ïalehkai kynjatbol jong ka Super Division bad ka First Division hapoh madan Artificial Turf, MDSA, South West Khasi Hills District.
Ha kane ka lympung kaba dei ha ka jingïalehkai League, ki don haduh 12 tylli ki kynhun ha 1st Division bad 8 tylli ki kynhun ha ka Super Division.
Ha ka jingïalehkai jong ka Super Division la ïoh ban pynïalehkai sdang ïa ka Mawkohphet Sports Club bad ka Rangjadong Sports Club ha kaba ka Mawkohphet SC jop da 3 – 1 kol pyrshah ïa ka Rangjadong SC ha kaba ïa ka kol kaba nyngkong la ïoh ba thep ha ka minit kaba 45 minit da u Wellbok Iawphniaw jong ka Mawkohphet SC kaba dei ha ka kyllastep.
Nangta, ha ka jingïalehkai jong ka kylla miet ka Mawkohphet SC ka la ïoh ban thep biang sa ar tylli ki kol kata na u Shenstarland Khar-wanniang ha ka minit kaba 60 bad na u Sunshine Iawphniaw ha ka minit kaba 68, katba ka Rangjadong SC ka la ïoh ban pynphai ïa ka shikol ha ka minit kaba 63 na u Silvester Syiemlieh.
Haba phai ha ka jingïalehkai jong ka First Division kaba dei hapdeng ka Marshilong Sports Club bad ka Kuchaphrang Football Club, kine baroh ar ki kynhun ki la ïa khaid khlem da ïoh ban ïa thep kol wat kawei ruh.
Lah ban kdew ba ha kane ka sngi kum ka dak ban sngewlem na ka bynta ka jingduh ïa ki mynsiem ba kordor ha ka jingtwa bad shah rong ki ïing ki sem, ka Mawkyrwat District Sports Association (MDSA) ka la pynlong ka jingsngap jar ba shi minit bad kumjuh ruh ka la phah ban deng da u ribon ïong ha baroh ki ‘rangïalehkai bad kumjuh ruh ki nongpynïaid.
U kongsan uba la wan plie pyrda ïa kane ka lympung u dei u General Secretary ka Mawkyrwat District Sports Association (MDSA), bah P. Wanniang ha ryngkat ka jingïadonlang lang u Working President ka MDSA, bah Y.G. Lyngdoh, u Vice President ka MDSA, u bah K.L. Lyngdoh lem bad kiwei kiwei ki ‘riew rangbah bad kumjuh ki padbah ‘riew ieit ban peit ïa ka jingïalehkai kynjatbol.
