Shillong, Naiwieng 08: Ka National Scholarship Portal (NSP) ka la sdang pdiang ïa ki aplikeshon na ka bynta ki Post-Matric Scholarship hapoh ka skhim NEC Merit Scholarship na ka bynta ki khynnah pule kiba dei na ka thaiñ shatei lammihngi na ka bynta u snem 2024-25.
Ka Sherry Lalthangzo, Economic Adviser (E&M), ka la pyntip shaphang ki jingdonkam ban ïoh ïa ka skhim NEC Merit Scholarship Scheme.
Ki nongbuh aplikeshon ki dei ban long ki nongshong shnong jong kano kano ka jylla hapoh ka thaiñ shatei lammihngi bad ki dei ban pule ha ki jaka pule ba la ïoh jingithuh bad kiba pule ïa ki course bapher bapher (Diploma, Graduate, Post Graduate, bad PhD/MPhil) ha India, hapoh bad shabar ka thaiñ shatei lammihngi.
Donkam 60% ki marks ha ka eksamin ba dang shu pyndep, bad ka ïoh ka kot jong ka kmie u kpa lane u nongsumar kam dei ban tam ïa ka T. 8.00 lak.
Ki kot ki sla ba donkam ban buh aplikeshon ki kynthup u number phone, Aadhaar (UID) Number, ka bank account ba la pynïasoh bad u Aadhaar, ka syrnot jong ka jingkamai, ka syrnot na ka jaka pule.
Ki khynnah pule ki lah ban apply online lyngba ka rynsan National Scholarship da kaba pyndonkam ïa une u link hapoh: [https://scholarships.gov.in](https://scholarships.gov.in).
Ban ïoh jingtip shuh shuh, lah ban download ïa ki kyndon shaphang ka NEC Merit Scholarship na ka: [NEC Scholarship Guidelines](https://scholarships.gov.in/public/schemeGuidelines/NEC_1234_G.pdf).
Lada don ki jingkylli, ki samla pule ki lah ban phone ïa ka North Eastern Council Secretariat.
