La plie ïa ka Pdengkarong Sub-Centre ban ai jingshakri ïa ka koit ka khiah ki paidbah

Amlarem, Naiwieng 28: U Myntri ka Sorkar Jylla Bah Lahkmen Rymbui ha ka sngi Thohdieng u la plie paidbah ïa ka Pdengkarong Sub-Centre kaba don ha ka shnong Pdengkarong, West Jaiñtia Hills District.
Kane ka Sub-Centre ka hap hapoh ka tnad ka koit ka khiah ka jylla bad la bei tyngka lyngba ka PM-ABHIM (NHM) hapoh ka snem 2021–2022 kaba la kot T. 55.50 lakhs bad ïa ka jaka la aiti da ka shnong hi, na ka bynta ka jingbit jingbiang ka koit ka khiah ha katei ka shnong ba kynthup ïa ka Pdengkarong, Amsyrwai, Amralang bad kiwei pat ki shnong marjan jong ka thaiñ War Jaiñtia.
Ïa ka jingïalang plie paidbah ha kane ka sngi la pynïaid daka Dr. P. Shylla, District Medical & Health Officer, West Jaiñtia Hills. Haba ai jingkren u ma Lahkmen Rymbui kum u kongsan ula ong kane ka Sub-Centre ka long ka nuksa kaba bha hapdeng ka jingïatreilang jong ki paidbah namar ba ka sorkar jylla ka la rai ban nym pyndonkam ïa ki Contractor hynrei ban aiti ïa ka jingtei ha ka Village Health & Sanitation Committee ka shnong Pdengkarong.
Ula pynpaw ruh ka jingsngewkmen ba wat hapdeng ka pisa kaba rit, na ka bynta kane ka project la lah ban pyndep da ka rukom kaba paka, U ong ka jingdon jong kane ka Sub-Centre kaba hajan ka shnong kan ïarap ïa ki paidbah ba kin ïoh jingshakri hala liang ka koit ka khiah ha ka por kaba biang.
U la pynpaw ka jingdon kane ka Sub-Centre, ki paidbah ka thaiñ kim donkam shuh ban leit sumar kum sha Jaraiñ kaba jngai (14 km), Nongtalang (22 km) bad Pdengsha kap (18 km) na bynta ki jingshitom ba rit, kaba la shim ïa ka por namar ka jingjngai ka lynti bad kaba pynshitom ïa ki longkmie ba armet, ki khunlung bad ki rangbah tymmen.
Ula kyntu ïa ki paidbah ban pyndonkam hok ïa katei ka Sub-Centre kaba lah ban ïoh jingïarap naduh ki jingïasyllok, ki test bad ki dawai da kaba kyntu ban kiar na kaba dih dawai klumar hi. Ula pynsngew ruh ban don ka jingïatreilang kaba bha hapdeng ki Nurse, ASHA, ki nongtrei bad ki paidbah.
Haba kren shaphang ka koit ka khiah jong ki paidbah, u MLA u ong naduh u snem 2018 hapoh ka jingïalam jong ka sorkar, ka jylla Meghalaya ka la sakhi ïa ka jingkylla kaba shai halor ka jingïap ki khunlung bad ka jingïap ki longkmie lyngba ki prokram MOTHER programme la ai jinghikai ïa ki paidbah ban leit sha ki jaka sumar bad ka jingpyndonkam ïa ka Universal Health Insurance Scheme.
Ula pyntip ruh ba mynta hapoh ka Amlarem Constituency ki don haduh 11 tylli ki Sub-Centres, hynrei hadien ka jingïohi ïa ka jingmyntoi jong kane ka Sub-Centre ban don ha Pdengkarong, ka sorkar jylla ka don ka jingthmu ban buh shuh shuh ïa ki Sub-Centre thymmai ha ki jaka ba donkam kum Amlarem Shyiap Amlanai, Jong-U-Chen bad Hawai-Bhoi, khnang ban pynjanai shuh shuh ïa ka jingshakri ha ka liang koit ka khiah paidbah, khamtam eh ha ki jaka ba jngai bad ki bynta khappud.
Haba kren shaphang ka roi ka par paidbah, u myntri u ong ka sorkar jylla ka don ka jingthmu ban pynbha bad pynheh ïa ki surok ha ki bynta bapher kum Amlarem sha Nongtalang, Pdengsha kap, Amkhlew, Pdengkseh bad Pdengkarong, ryngkat bad ka jingïasnoh surok na Darang sha Shnongpdeng haduh Amkoi bad ka sorkar jylla ka kloi ban pynlut haduh T. 20–30 klur na bynta ban pynïoh jaka hynrei ka jingïoh jaka na ki trai jaka ka dang long ka jingeh, kaba pynslem ïa kane ka jingthmu, hynrei ula kyntu ïa ki paidbah ban sngewthuh ba ka jingïatreilang ka long kaba donkam ban wanrah ïa ka roi ka par kaba neh.