Amlarem, Nailur 27: U myntri ka Pule Puthi, Revenue & Disaster Management, Information & Public Relations bad ka Law uba dei ruh u MLA ka 7-Amlarem u ma Lahkmen Rymbui, ha kane ka 26 tarik u Nailur 2025 ula plie ïa ka ïing skul thymmai jong ka Amlari Model Government Lower Primary School, West Jaiñtia Hills.
Kane ka skul kaba la seng ha u snem 1964 kala long ka nongrim ha ka jinghikai ha kane ka thaiñ bad mynta ka sngi ka dei sa kawei pat ka thong kaba kongsan haka jingïaid lynti jong ka.
Haba kren ha ka jingïalang u ma Rymbui ula kdew ïa ka jingdonkam ban long kiba sngewkhlaiñ bad kitkhlieh naduh ki nonghikai, ki nongpynïaid skul bad ka imlang sahlang ha kaba pynneh pynsah ïa ki jingtei sorkar. Ula pynpaw ruh ïa ka jingkitkhlieh jong ka sorkar ban phah ïa ki nonghikai kiba biang sha ki skul.
U Myntri ula kdew ruh ïa ka jingïarap ba ïoh lyngba ka Samagra Shiksha, kaba ai ïa ki kot phlim, ki uniform bad ki jingbam sngi sngi (mid-day meal) sha ki khynnah skul sorkar. Ula pynshai ruh shaphang ka Chief Minister’s Scholarship Scheme (CMSS) 2025, kaba ai T.6,000 shi snem sha ki samla pule ka Meghalaya naduh Class-XI haduh kyrdan PhD, kaba la pynmyntoi ïa ki 80,000 ngut ki samla pule. Ula kdew ruh ïa ka jingpynkylla thymmai ïa ki scheme jingai scholarship.
Nalor kata, u la pynpaw ruh ïa ka jingtrei jong ka sorkar jylla ban pynbha ïa ki surok ha ki nongkyndong, kynthup ïa ka jingmaramot ïa ki surok Tawah-U-Sdiah, Amlanai bad Amsohrahong. U la pynpaw ruh ïa ki jingjop haka jingplie paidbah ïa ka Captain Williamson Sangma State University bad ka jingthaw ïa ki skul college thymmai ha Patharkhmah bad Mawphlang, katba ki skul medical kin sa mih ha Shillong bad Tura. U la kdew ruh shaphang ki prokram ba paw jong ka sorkar kum ka MOTHER programme, ki kam pynroi ba bun jait. ki skim ban kyntiew ïa ka kamai kajih, ka rep ka riang bad ka kam ri jingri.
Ïa ka jingïalang la pynïaid da u ma H. Pohphlet, Rangbah Shnong jong ka Amlari Model Village, kiwei de kiba la ïadonlang ki kynthup ïaka kong Mebapynshai Khonglah, Head Teacher, ma Dr. D. Lyngdoh, BDO Amlarem, ma D. Lakashiang, Daloi Elaka Satpator, kong D.P. Lytan, SDSEO Amlarem, u ma M. Swer, MDC jong ka 1-War East bad uba dei u EM JHADC bad la ïoh ka jingai khublei da u ma N. Suja, Ex-Waheh Shnong, la pynkut ïa ka prokram da kaba pynbud lang ïaka jingrwai “Ri Khasi Ri Jaiñtia.”
