Shillong, Lber 14: Ka Pt. Deen Dayal Upadhyay Community College (DDUCC) bad ka Skill Development Centre, Wahïajer kaba dei ruh ka Community College jong ka North-Eastern Hill University (NEHU) ka la ïoh ban pynlong ïa ka workshop halor ka “Organic & Integrated Farming in Modern Agriculture”.
Ha kane ka programme la wan ban ïashim bynta da ki 300 ngut ki nongrep na ki kynhun bapher bapher na Jaiñtia Hills, Meghalaya. Ki riew shemphang kiba la kren ha kane ka sngi ki la batai bniah haba ïadei bad ka kam rep organic da kaba batai ruh ha ki rukom rep da ki tiar ka juk mynta. Ha kane ka workshop, ki nongrep ki la ïoh ka jingmyntoi kaba bun bad ki jingtip ha kaba ïadei bad ka jingrep tynrai khlem da ka pyndonkam da ki dawai. Ka jingthmu jong kane ka programme ka long ban pynkupbor ïa ki nongrep lyngba ki skill development program khnang ban kyntiew ïa ki ha ka ïoh ka kot bad ka kamai kajih jong ki.
Ha kane ka sngi ka la don ruh ka jingplie ïa ka “Golden Jubilee Community Hall” kaba la noh synniang da ka Jaiñtia Hills Cement Manufacturer’s Association (JHCMA). Ïa ka prokram la sdang da ka jingkren pdiang sngewbha ba la ai da ki samla pule ka DDUCC kaba la pynbud pat da ki prokram kolshor bad ki nongmihkhmat na ki nongrep. Ïa ka prokram la pynïaid da Prof. (Mrs.) S. M. Sungoh, Principal I/c, DDUCC, da ka jingdonlang Prof. Prabha Shankar Shukla, Hon’ble Vice-Chancellor, NEHU, uba la ïashim bynta da ka online, u R. K. Pareek, President, JHCMA uba la shim bynta ha kane ka prokram kum u kongsan bad la donlang ruh da ki dkhot jong ka association, u Prof. H. Lamin (Retd.), Founder Principal I/c, DDUCC, u Andriew Sari, Secretary, ka shnong Wahïajer, kiwei ki dkhot jong ka shnong Wahïajer, kiba la shah khot sngewbha bad kiwei kiwei.
U Prof. P. S. Shukla, Vice-Chancellor, ka NEHU lyngba ka jingkren online u la banjur halor ka jinglong kongsan jong ka rep ka riang ha ka ri kaba wanrah lang ïa ka jingroi jingsan bad kaba dei ruh ban ïaid lang bad ka rep tynrai ka ba dei ban pynneh pynsah. U la banjur ruh halor ka DDUCC bad ki jingpyrshang jong ka ha kiba bun ki bynta lyngba ki jingai jinghikai ha ki sap ki phong kiba wanrah ki jingkylla ïa ka jingmut jingpyrkhat bad ka jingim jong ki khun samla bad khamtam ïa kito kiba ïa shim bynta ha kum kane ka prokram ba la pynlong da ka Community College bad u la ai ruh ka jingïaroh ïa ka Jaiñtia Hills Cement Manufacturer’s Association (JHCMA) halor ka jingnoh synniang jong ka ïa kane ka College ba kan lah ban pyntyllun ïa ki kam hapdeng ki nongshong shnong jong ka Wahïajer.
Kiwei kiba la kren ha kane ka prokram ki kynthup ïa u Andriew Sari, Secretary, ka shnong Wahïajer, Prof. H. Lamin (Retd.) Founder Principal I/c, DDUCC, Prof. D. Walia, Dean, School of Human & Environmental Sciences, Prof. B.P. Sahu, Dean, School of Education, NEHU, Dr. F. R. Sumer, Librarian, NEHU bad kiwei kiwei. Na ka liang u Bah Andrew Sari, Secretary ka shnong Wahïajer u la ai khublei ïa ki bor pynïaid ka DDUCC bad NEHU halor ka jingshim khia jong ki ban pynlong ïa kum kine ki prokram na ka por sha ka por kaba long ka jingmyntoi ïa ki samla bad ki nongshong shnong ha Wahïajer bad ha Jaiñtia Hills District. U la ai khublei ruh na ka liang ka shnong ïa ka Jaiñtia Hills Cement Manufacturer’s Association (JHCMA) halor ki jingnoh synniang jong ka sha ka DDUCC sha ka Community Hall bad ka jingïarap ban kyrshan ruh ïa ki kam nangne shakhmat.
Ha ka prokram ka la don ka jingpynkup burom ïa u R. K. Pareek, President, JHCMA da ki memento bad kaba la pynkut pat da ka jingaiti ïa ki symbai sha baroh kiba ïashim bynta bad ïa ka shnong Wahïajer ba kan pyntreikam na ka bynta ban kyntiew ïa ka rep ka riang.
Ïa ka prokram la pynkut da ka jingai khublei na u Bah Wolnish Rymbai, Programme Coordinator, DDUCC bad ka jingrwai ïa ka National Anthem.
