Jowai, Nailur, 07: Ka God’s Glory English School kaba don ïa ka tien phira, “Wisdom with Godliness” kawei na ki shlem ai jinghikai ïa ki khynnah skul naduh Class Tiny Tots haduh Class-V kaba don ha ka shnong Moowamon Mihmyntdu, West Jaiñtia Hills District la plie da u Nyntri ka Sorkar Jylla u Bah Kyrmen Shylla ha ka jingïalang ba la pynlong ha ka sngi Saitjaiñ.
Ïa ka jingïalang la pynïaid da u Chairman ka skul u ma Piwell Shylla, ha ka jingdonlang u Symbud Kongsan ma Wailaddame Shwa Siangshai uba dei u Deputy Chairman ka JHADC, MDC ma Cresentus Susngi, MDC ma Rikut Parien, Rev. R.B Swer, TBn. Ales Shylla, Rangbah Dong Moowamon ma Sonche Chyrmang, Chief Adiser ka skul Dr. Prince Stone Shylla, ka Principal jong ka skul kong Memris Swer kaba ai ruh ki kyntien ai khublei, nalor kiwei de kiba la shah khot sngewbha.
U ma Piwell Shylla ula pynpaw ka jingsngewnguh ïa ka Dong Moowamon Mihmyntdu kaba la kloi ban ai NOC ïa ka skul ban shakri ïa ka lawei jong ki khynnah skul, ula ong ha u snem 2022 ka nongseng jong ka skul ka kong Shimti Shylla ka la pyrshang ban wad ki lad ki lynti ban sdang noh ïa kane ka skul hapdeng ki jingeh ba buh hynrei mynta ka sngi jong u snem 2025 la lah ban plie noh ïa ka.
Kum ka ïing hi baroh kawei ula ong ‘da ka jingphai sha U Blei ngi la lah ban sdang ïa kane ka skul naduh Class Tiny Tots haduh Class-V kaba don ïala ka jong ka Building ba ar mala bad ha ka jingïakynduh bad ka Joint Director ka tnad pule puthi jong ka sorkar, ka skul ka don ïa ka thong ban pynkiew shuh shuh ïa ki Class ba kham shalor namar ïa ka plan jong ka ïing skul ka long saw mala’.
Kiwei de kiba ai jingkren ha kane ka sngi ki la ai ka jingkitbok kitrwiang ïa kane ka skul ba kan dang lah ban ïaid shakhmat ha ka jingshakri ïa ki khynnah skul ha ryngkat ka akor ka burom bad ka tip briew tip Blei.
La pynsngew shuh shuh da ki nongkren ka jingdon jong kane ka skul kan ai jinghikai ïa ki khynnah skul jong kane ka thaiñ Mihmyntdu bad kumjuh ïa ki shnong ba marjan da kaba kim donkam shuh ban leit sha ki jaka pule ha ka lynti kaba jngai bad ka jingdheng kali kum sha Jowai bad kyrmen ba kane ka skul kan ïoh ïa ka jingshañiah na kiba bun ba lang.
Na ka liang u kongsan ma Kyrmen Shylla haba ai jingkren ula ai ka jingïaroh ïa ka ïing ka seng kiba seng ïa kane ka skul shi bynta ban pynneh pynsah ïa ka nam ka burom jong ka jingthrang jong ki kmie ki kpa, u kitbok ïa kane ka skul ban long kiba ïaishah haduh ban poi sha ka thong.
U ma Kyrmen ula kular ruh ban synñiang na ka pla la jong haduh 5 tylli ki kor Computer shi bynta ban sdang ïa ka jinghikai da kaba ïaid lang bad ka juk stad ba mynta, na ka bynta kiwei de ki jingdonkam ba shakhmat ula kyntu ïa ki bor pynïaid ka skul ba kin wan ban pynsngew ïa ki jingdonkam jong ki ha ki sngi ban wan. Ula pyntip ruh hapoh ka East Jaiñtia Hills ki don ka Fund DMF da ka jingïatreilang bad u Deputy Commissioner ka EJHD la lah ban ai jingïarap kum ki Computer bad ka jingshna pynbha pynmiat ïa ki skul.
La pyntip ba kane ka skul kan sdang ban ai Admission sha ki khynnah skul naduh ka 8 tarik u Nailur, 2025 na ka bynta ka Class Tiny Tots haduh Class-V, ha kane ka skul yn ai jinghikai ha kiba bun ki bynta ïa ki khynnah skul. La pyntip ruh ba ka skul kan don ïa u Doctor ba hajan eh u ban ai jingsumar lada don kino kino ki jingdawa ha ka liang koit ka khiah.
