Shillong, Nohprah 15 : U Myntri ka tnad ka Koit ka Khiah ka sorkar jylla, James K Sangma ha ka sngi Palei u la plie paidbah ïa ka Cancer Wing jong ka Civil Hospital Shillong ha ryngkat ka jingdonlang u Principal Secretary ka tnad, u Sampath Kumar nalor kiwei kiwei ki ophisar jong ka tnad.
Haba kren ha katei ka jingïalang, u Myntri u la ong ba khatduh ki sngewkmen ba la lah ban pyndep noh ïa katei ka Cancer Wing hadien ba ka la shim por slem slem ban pyndep pura. Shuh shuh u ong ruh ba u ktah haduh katta katta ka mynsiem ban ïohi ba uwei na ki heprit ba koit na katei ka jingpang u la wanrah artad bad u syntiew ha ka por ba u rung shapoh. “Une u syntiew u pyni ïa ka dak ka jingkyrmen ïa baroh,” ong u Myntri.
Ha kawei pat ka liang u la pynpaw ruh ka jingsngewnguh ïa baroh ki ophoisar bad ki doktor kiba la trei borbah na ka bynta ban pynurlong ïa katei ka jaka sumar.
“Ka la shimpor slem shisha ban pyndep ïa kane ka jingtei namar ïa kane ka Cancer Wing la mang tyngka naduh u snem 2008 bad ka shimpor haduh 14 snem ban pyndep pura bad ïoh ban plie ïa ka,” u la ong.
Shuh shuh u ong ruh ba watla kim pat lah ban pyndep pura hynrei ka jingsumar ka la ïaid bad ki doktor ki la trei borbah.
La pyntip ruh ba ka sorkar jylla mynta k apynkhreh ruh ban wanrah sa kawei ka cancer wing ha Tura.
