Jowai, Naitung 17: Ka ophis u District Sports Officer ka West Jaiñtia Hills District mynta ka sngi palei 17 tarik kala ïoh ban plie ïa ar tylli ki Grassroot Football Centre ba thymmai kiba kynthup ïa Larnai Grassroot Centre haka Shnong Larnai bad ka Moodymmai Grassroot Centre haka Shnong Moodymmai.
Ha kane ka sngi la wan ban ïadonlang da u kongsan ma Jesse Suiam (MDC), u ma K. Passah DSO WJHD, ma P. Lamare Vice President ka WJDSA, ki Waheh Shnong bad ki Secretary Shong jong ka shnong Larnai bad Moodymmai.
Ka jingplie ïa kine ki Grassroot Football Centre hapoh ka District ka long shi bynta ban jied ïa ki khynnah rit shynrang bad kynthei kiba don shisha ïa ka sap ïalehkai phutbol, khnang ba kin ïoh lad ban pynpaw pyrthei ha kino kino ki lynpung ïalehkai kiba yn sa pynlong.
Na ka liang ki nongkren ha kane ka sngi kila pynpaw ka jingsarong ba ka West Jaiñtia Hills kadei kawei na ki District kaba la pynmih shibun ki khlur ïalehkai ki ban mihkhmat ïa ka District, ïa ka jylla bad ïa ka ri hi baroh kawei.
