Shillong, Nailur 27 : ïa ka Blueprint na ka bynta ban kham pynkylluid ïa ka nongbah Shillong la dep phah sha ka Indian Institute of Management (IIM) Shillong na ka bynta ba kan bishar bniah bad ban ai jingmut shuh shuh kumno ban pynïaid shakhmat ïa kane ka projek.
ïa kane la pyntip sha ka ïing bishar High Court jong ka jylla ha ka Sngi Ba Ar da ka sorkar hadien ba la ujor mukotduma PIL da u bah Philip Khrawbok Shati halor kane ka jingdheng kali bad khapngiah hangne ha sor Shillong.
Ka sorkar ka la ïathuh ruh ba ïakane ka blueprint ban pynkylluid ïa ka sor Shillong la pynkhreh da ka tnad kam pohïing ka jylla ha ka jingïamir jingmut lang bad kiwei kiwei ki tnad sorkar da kaba pynshong nongrim ruh na ka kaiphod ba la pynkhreh da ka Dalberg Global Development Advisors ha u Kyllalyngkot 2021.
U Advocate General jongka sorkar u la ïathuh hakhmat ka ïing bishar ba ïa mynta ka sorkar ka dang phah ïa kane ka blueprint sha ka IIM Shillong ban bishar bad ai jingmut shuh shuh sa na ka liang jongka ruh.
Kane ka blueprint ka long halor ki saw tylli ki nongrim kumno ban thaw lad ban pynkylluid ïa ka nongbah na ka jingbun ki kali paidbah bad kumno ban thaw lad ban pynduna noh ïa ka jingmih jong ki kali sha surok.
Ki don ruh bun ki jingbatai bniah naduh ka jingweng ïa kiba shong die jingdie ha ki surok ïaid kjat, ban pynïaid bun ki bus bad kiwei kiwei ki lad ban shong ha ka leit ka wan bad ha ka kit ka bah ruh.
Kane ka jingthmu ban pynkylluid kam dei tang ban pynduna ïa ka jingïaid ki kali hynrei wat ban pynheh ïaki surok ruh bad ban pynbun ruh ïaki bypass ban kiar ka ïaid napdeng ka sor Shillong. Nalor kane ban buh ruh ïa ki ropeway ban pynkloi ïa ka leit ka wan.
Ha ka hukum ba la pynmih la pynpaw ba namar ka jingpynkhreh ka dang ïaid shakhmat hynrei wat la kumno ban ïoh ïaka pisa pat ym shym la pynpaw kumta la kyrmen ba ka sorkar kan leh hi ïa kaba donkam ban ïoh pisa ban pynïaid ïa kane ka projek hadien ba la dep ïoh ïa ka kaiphod na ka IIM, Shillong.
Ka ïing bishar ka kyrmen ruh ba ka IIM kan bishar bniah bad ai jingmut kaba biang bha ka ban ïarap ban pynkylluid da shisha ïa kane ka nongbah Shillong. Ka jingshong bishar biang ïa kane ka mukotduma kan long ha ka 28 tarik Risaw 2022.
