Shillong, Risaw 21: U Myntri ka tnat Jngohkai Pyrthei u Timothy D Shira ha ka sngi baar u la ong ba ka kam jngohkai ka la nang kiew shaphrang ha ka jylla Meghalaya.
“Kito ki sngi ha u snem 1965 haba nga leit jngoh ïa ka Cherrapunjee, ym shym la don eiei hynrei mynta ki la don bun ki hotel kiba bha bad bun na ki briew ki la kylla long kiba riewspah bad ki la shna ruh ïa ki hotel kiba bha,” ïathuh u Shira sha ki lad pathai khubor.
Katkum ka jingong jong u, ka kam jngohkai ka la kylla long ka tyllong jong ka ïoh ka kot, ka kamai kajih na ka bynta ki nongshong shnong, ha kaba bun na ki briew ki la ïoh jingmyntoi na kane ka karkhana.
U Myntri u la pyntip ba ka sorkar ka la shim ki sienjam ban pynheh shuh shuh ïa ka Umroi airport, ha kaba kan pynlah ïa ki liengsuiñ kiba heh ban wan hiar bad ban wanrah ïa ki nongwan jngohkai sha ka jylla.
U la kdew ruh shaphang ka jingthmu ban pynheh ïa ka Baljek Airport ha Garo Hills.
U Shira u la kdew ruh halor ka jingdonkam ban pynbha ïa ki lad jingpynïasoh. “Shisien ba la pyndep ïa ka jingtei ka jingkieng nalor ka wah Brahmaputra ha Phulbari, kan sa pynïasoh ïa ka Meghalaya sha Mizoram, Tripura, Manipur, bad kiwei ki bynta jong ka jylla Assam.”
U Shira u la kdew ruh ïa ki tamasa ki ban wan, ba kynthup ïa ka Cherry Blossom, Wangala, bad Meong festival, bad u la pynpaw ka jingthmu jong u ban don shuh shuh ki jaka kiba thymmai bad kumjuh ruh ban pynbha ïa ki jaka jngohkai kiba don mynta.
U la banjur ruh halor ka jingdonkam ki homestay ha ki thaiñ nongkyndong, ki ban ai ki jaka sah ïa ki nongwan jngohkai bad kaba long ka jingmyntoi ïa ki nongshong shnong.
U Myntri u la banjur ruh halor ka jingdonkam ban kyntiew bad pynbha ïa ki jingtei ha ki jaka ba khring ïa kiba wan jngohkai, kynthup ki lynti ïaid kum sha ka krem Siju.
U la pyni ruh ki nuksa halor ka jingleit jngohkai sha ki krem kiba la kiew bha sha kiwei ki ri, ha kaba ki lad jingtei ki la ïaid sted bad kane ka la pynlah ïa ki nongwan jngohkai ban rung shapoh ki krem da ki jingshngaiñ bad jingsngewkmen.
