La nangkiew ka 1st MLP Bn SS ha kine ki 50 snem ba la leit wat hadpeng ki jingeh: Ampareen

Shillong, Nailar 18: Ka 1st MLP Battalion Secondary School, Mawïong Umjapung, ka la pynkutnoh ïa ka jingrakhe ïa ka jingdap 50 snem da kaba shongshit bad sngew sarong. Ha kane ka jingrakhe ka Myntri ka tnat ka Koit ka Khiah ka sorkar ka Dr. M. Ampareen Lyngdoh, ka la long ka kongsan katba ka Director General of Police (DGP), ka Kong I. Nongrang, ka la long ka symbud kongsan.
Kane ka jingrakhe ka la sdang da ka jingshad duwai, pynbud da ki prokram kolshor bapher bapher ki khynnah skul bad ka jingtem na ka Band ki pulit, kaba pyni ïa ka jingkiew kane ka jaka pule.
Ka Dr. M. Ampareen Lyngdoh, ha ka jingkren ka la pynpaw ïa ka jingai khublei ïa ka 1st MLP Battalion bad ki dkhot ba la seng ïa ka, kiba la ïohi jngai ban thaw ïa kane ka skul hapoh ka jaka jong ki pulit. Ka la ïaroh ïa ka bynta ba kongsan ka skul kaba la trei shitom ban wanrah ka pule puthi kaba bha sha ki khynnah kiba dei ki khun jong ki pulit ha kiba bun bun snem.
“Nga sngewkmen ban ïohi kane ka jaka pule ka la kiew bad mynta ka la ïeng lang bad kiwei pat ki skul kiba la paw khamtam ha ki kam ba ki leh na ka por sha ka por,” ong ka Dr. Lyngdoh. Ka la pynpaw ka jingdonkam ban pynlut ha kum kine ki jaka pule bad kyntu ïa kiwei pat ki nongthaw aiñ ne MLA ba kin kyrshan haba ïadei bad ki lad jingmyntoi ha ka pule puthi ha ki constituency jong ki.
Katba ka DGP ka Kong I. Nongrang ka la pynpaw ka jingïaroh ïa ka jingkiew kane ka skul ha kine ki snem ba la leit. Ka la kdew halor ki jingleh bha ka skul ha ki SSLC examination kumba la sakhi ïa ki jingangnud ïa ka jinglong kynsai ha ka pule puthi. Haba kynthoh ïa ki bor pynïaid skul ba ki la pynkup burom ïa ki samla pule kiba la jop ha ki jingim jong ki, ka la ong, “Kane ka jaka pule ka la jop ïa kiba bun ki jingïaleh bad ki la ïaid lang la palat 50 tylli ki snem bad ïa kane dei ban ai ka jingïaroh shisha.”
Haba phai sha ka jingsdang kaba rit ka skul ha Bishnupur ha ki snem ba la leit, ka Kong Nongrang ka la pynpaw ka jingsngewskhem ba kan ïai bteng ban kiew ha ki sngi ban wan.
Ha kane ka sngi ka kongsan ka la plie ïa ka Computer Lab ba thymmai, ka la pynlait ïa ka Golden Jubilee souvenir jong ka skul bad pynkup burom ïa ki nonghikai bad ki nongpule barim jong ka skul. Ka Dr. Lyngdoh ka la pynbna ruh ban synniang kumba T. 1 lak na ka bynta ban tei ïa ka library bathymmai na ka bynta ki khynnah skul.