Shillong, Nohprah 6 : U Myntri ka tnad pynmih bording jongka sorkar jylla u Abu Taher Mondal mynta ka Sngi Thohdieng u la ong hadien ba la dep shna pynskhem ïa ka jingkieng Dam Umiam mynta ka dam bad ka jingkieng kaba ïaid nalor jongka ka la nang skhem na kata ka daw ym shah shuh ïa ki kali heh ban ïaid bad shen ka sorkar kan sa shna da ka jingkieng ba thymmai lehse shaneng duh lane sharum duh jongka dam ban ïoh da kawei pat ka surok ban ïaid ki kali kiba hiar bad kiew sha Shillong.
Haba ïakren bad ki nongthoh khubor u Mondal u la ong “ Kat kum ka buit jingstad mynta katei ka dam ka la nang skhem hadien ba la dep shna pynbha ïa ka kat kum ki jingai jingmut jongka IIT Guwahati namar la shna thik kat kum ka jinglap jongki ha ka jingbishar bniah ïa ka Dam bad mynta ym don jingpei um shuh na katei ka dam. Kane ka jingkhang ban ïaid ki kali heh nalor katei ka dam ruh ka dei ka jingai jingmut jongka IIT hi”.
Hooid u la ong ba kane ka jingkhang ïaid ïa ki kali heh ka la ktah jur shisha ïa ka iaid ka ïeng ki paidbah hynrei ula ong pat hap ban leh pat na ka bynta ka jingskhem jongka Dam namar kane ka dei ka dam kaba ai bording bun eh ïa ka jylla Meghalaya. “Nga sngewsih ba kane ka la ktah jur ïa ki paidbah khamtam kiba dei ban poi sha ISBT da ki bus hynrei ym banse ban leh na ka bynta ka jingskhem bad neh slem jongka dam. Namar kane ka jingskhem jongka dam kan pynshngaiñ ruh ïa ki briew kiba sah sharum jongka dam bad wat kiba ïaid ba ïeng nalor katei ka jingkieng dam ruh. Na kata ka daw ngi la khang ban ïaid ki kali heh” ong u Mondal.
U la ïathuh ba ka sorkar ka la shaniah ha ka tnad PWD ba kan wad da kawei ka jaka ban shna ïa ka jingkieng ban pynsuk ïa ka leit ka wan ki paidbah bad “ Nga ngeit skhem ruh ba shen ngin sa ïoh da kawei ka jaka ban shna ïaka surok ba thymmai ban kiew bad hiar na Shillong”.
Hadien ba la dep shna pynbba ka jingskhem jong kane ka jingkieng kan ym duna shuh ïaka 15 haduh 20 snem. “ Wat la katta ruh ka shong pat ha ka jinglong ka mariang bad khamtam ban lait na ka jingkhynñiuh jumai. Lada wan u jumai ba jur ngim tip kaei ka ban jia ruh bad kumno ka jingkieng kan long. Hooid mynta te ka la nang skhem namar ki jingpei um ki la dep set lut bad ki don ki briew ki ban ïai bud dien ïa ka jingkieng dam bad wat ki engineer ka MeECL ruh kin hap ban ïatreilang halor kane ka kam”.
Halor ka jinglong ka bor ding ha ka jylla u myntri u la ong “ Kat haduh mynta ka dang biang beit bad ngi dang pahuh ka bor ding bad ngin pyrshang ban peit thuh ba mynta u snem ruh ki paidbah kin ym hap ban ïaid lyngba ka jingpynlip bording ne load shading”.
