U Bah DD Lapang, uwei na ki Nongïalam jong ka jaitbynriew Khasi, ula khlad noh bad u dei tang une u rangbah, uba la long Myntri Rangbah ha ka sorkar jylla, haduh san sien kynthih. Ka sorkar jong u, kam shym la neh skhem ha kitei ki san sien, hynrei u dei pat tang ma u marwei, uba don ïa ka mynsiem ïakhun, ban shong ha katei ka shuki kaba hajrong duh ha ka saiñ pyrthei jong ka jylla.
Ka jingshisha, ka long ba hadien jong utei u rangbah, ngi la duh ïa ki Nongïalam, kiba shakri ïa ka jaitbyn riew, da ka mynsiem jong ka jingïaleh ïa ka jylla rilum. Ngi dei ruh ban kynmaw ba nalor U Bah DD Lapang, ngi don sa tang u Bah JD Rymbai bad U Dr Donkupar Roy (kiba la khlad), kiba poi sha ka kyrdan Myntri Rangbah bad lait nangta, ngi la duh noh ïa ki Nongïalam kiba don ïa katei ka thong, hynrei ngi la ïoh noh, sa tang ki nongmihkhmat suda, kiba hun ban peit ha la i jong i lyngkha, ym shuh na bynta ka khia ka shon jong ka jaitbynriew.
U Bah DD Lapang, haduh ha ki sngi jong ka jingkhlad jong u, u ïoh ïa ka kyrdan kum u kpa jong ka ri Bhoi bad katei ka pyni, ba um dei tang u nongmihkhmat jong ka Nongpoh Constituency, hynrei u dei jong ka Ribhoi hi baroh kawei, kaba don mynta 5 tylli ki Constituency bad ka dei kata keiñ, ka mat kaba ngi hap ban pynshong nongrim, ïa kaei kaba ngi ong, ba ngi la duh ïa ki nongïalam bad ngi don mynta, sa tang ki nongmihkhmat bad katei ka thew ba u nongïalam u peit ïa ka jinglong jingman jong ka thaiñ bad ka jaitbynriew, hynrei u nongmihkhmat, u peit tang ïa ka Constituency kaba u mihkhmat bad katei ka jinglyngkot jingmut, ka jia ha kine ki sngi, ha kaba ki nongïalam Khasi Pnar, kim don shuh, kiba nud ban saham, wat tang ïa ka shuki Lamphang dorbar, ka shuki Symbud Lamphang dorbar, ka shuki jong u Nongïalam liang pyrshah, nai ïakren ïa ka shuki Myntri Rangbah lei lei; kaba ha ki phew snem mynshwa, la ju ïasam hapdeng ïa ki ar jaitbynriew.
Kitei ki nongïalam, kiba don ha ka juk ïaleh hill state lane kiba dang ïoh ïa ka jingshaniah jong uba bun, ki la leit noh; mynta ki la wan sa tang ki nongmihkhmat, kaba da remdor than, ba kin jop, wat tang ïa kawei ka elekshon bad lada kim dei ki riew dap klur, lane ki dap million, kumta kim lah satia ban long nongmihkhmat bad kane ka jinghiar kyrdan ki nongmihkhmat, ka la thew jngai ba ka sur jong u paidlang Khasi, Jaiñtia lane u 36, kam don dor eiei shuh, namarba la shah shohdap da ka tyngka pliah.
Kumba ka long mynta lei la ïohi ba la don sa tang ki nongïalam na Garo Hills bad kane ka la neh lah bun snem.
Ka jingpoh dor ka paw tyngkreiñ ha kine ki Sngi ha kaba wat ha ka saiñ pyrthei jong kane ka juk ka jingïaknieh shuki kam pat kut satia ha kaba wat ïa ki MLA kiba la long Myntri ka sorkar kiba tbit ban thaw aiñ la shu pynhiar shuki syndet tang na ka daw ka jingïateh kular hapoh ki seng saiñ pyrthei bad kane ka la pynpoh dor shibun bha.
Ha ka jaka ba ki party riewlum kiba don ha khasi Jaiñtia Hills kidei ban ïatylli ban pynhab noh ïa ka shuki Myntri Rangbah ban pynïeng da u khasi hynrei kine ki nongmihkhmat ki ia khun doh ïap tang ban ïoh knieh noh ïa ka shuki jong u MLA uba na kajuh ka party khlem pyrkhat shuh ïa ka bha ka miat jong ka jaitbynriew Khasi.
Kaba sngewlehraiñ shuh shuh ka long ba u don uwei u nongmihkhmat napoh ka party riewlum uba la pynksan ba ka jingpynhab shuki ïa u MLA na la ka jong ka party ka dei namar ha ka saiñ pyrthei ym don paralok ne nongshun bad ka saiñ pyrthei kam ju neh hynrei ka ïai bteng ban kylla na ka por sha ka por.
Dei halor kine ki jinglong jong ki saiñ pyrthei kiba la slem bha kiba don ha ka jylla Meghalaya ba ki paidbah ha kaba khatduh ki phai khmat noh sha ka Voice of the People’s party bad kumba la ïohsngew sharum shaneng imat kine ki party ba la rim ha ka jylla kin sa duh jait noh na kane ka jylla na ka daw bym don ki nongïalam hynrei don tang ki nongmihkhmat.
