Nongpoh, Naitung 18: Ka Rep Sohtrun ha Ri Bhoi ka dei kawei na ka jingrep ba bun ki nongrep ki ioh jingmyntoi bad teng teng pat lada ym don ka dor ha ïew ha hat ka wan rah ka jingduhnong kaba khraw ïa ki nongrep Sohtrun ha Ri Bhoi.
Haba kren halor ka rep Sohtrun kiba bun hi ki shnong ba rep Sohtrun ki dei ki shnong ba hap ha ka thaiñ Nongpoh bad don ruh ki nongrep kiba la rep bun bha ba ki shim ba kane ka rep sohtrun ruh ka dei kawei na ka kam rep kaba ki lah ban kyrshan ïa ka ïing ka sem.
Halor kane ka rep Sohtrun kiba bun ki nongrep Sohtrun ha Ri Bhoi ki la kham phuh mut bad ki da kmen ruh ba mynta u snem ka dor jong u Sohtrun ka kami aid iew ha ki iew ki hat.
Haba la ioh ban ïa kren bad katto katne ki nongrep Sohtrun ha ka thaiñ Nongpoh, ki la pynpaw ba mynta u snem ki nongrep Sohtrun ki kam don jingkyrmen, namar tang shu mih u Sohtrun lyiur ki la lah ruh ban ioh ïa ka dor kaba kham biang ha ïew ha hat.
Ki la pynpaw ruh ïa u Sohtrun ba ki rep ym dei tang ba ki shalan ban die tang hapoh ka jylla Meghalaya sha ki thaiñ ba ym don kiba rep Sohtrun, hynrei ïa une u Sohtrun Lyiur ki lah ruh ban die ne shalan wat sha Assam. Ka long ruh ka jingkmen ïa ki nongrep na ka bynta jong une u snem ba ki ioh ïa ka dor kaba kham biang ha ïew ha hat bad lada ym don hi ka dor jong u Sohtrun bunsien ki duhnong bad kim ioh jingmyntoi wat la ki la sumar ne pynheh pynsan ïa u Sohtrun ha ki jaka rep.
Shuh shuh, ki nongrep ki la pynpaw ruh ba ka sorkar ka la dei ban phai khmat ruh sha ki nongrep Sotrun ha Ri Bhoi da kaba thaw ki lad ki lynti ym tang ban shu die ïa ki Sohtrun ha iew na ka bynta ka jingbam jong ki paidbah, hynrei lada ka sorkar ka lah ban wan rah ïa ki kynja Food Processing Unit kane kan ïarap ruh shibun ïa ki nongrep ba ïa u Sohtrun ym tang ba ki shu die ha iew ha hat ban bam ki briew, hynrei ba kin lah ruh ban pynmih da ki Umsoh kaba long ka jingmyntoi ïa ki nongrep.
