La maham tyngeh ïa ki kali kit mar khia ban ïaid na jingkieng Nongspung – Laitmawsiang

Shillong, Naitung 19 : Ka ophis jong ka District Magistrate jong ka East Khasi Hills, Kong RM Kurbah ka la pynmih ïa ka hukum katkum ka kyndon 163 jong ka Bharatiya Nagarik Suraksha Sanhita (BNSS) kaba khanglad ïa ki kali kit ba kit ia ki mar kiba khia ban ïaid lyngba ka jingkieng No. 1/1 kaba don ha ka surok heh ban ïaid halor ka jingkieng No. 1/1 ha ka surok Nongspung-Laitmawsiang.
Katkum ka kyrwoh, la mana tyngeh ïa ki kali kiba kit palat ïa ka 9 ton ban ïaid lyngba katei ka jingkieng.
Shuh shuh la ong ba katei ka jingkieng ka la synjor bad ka lah ban shan tang 9 ton. La ong ruh ba ka jingmaramot mynta ka dang ïaid bad kumta kane ka sienjam ka long ban khanglad ïa ka jingjulor kaba kham jur ha katei ka jingkieng.
Nalorkata, la ong ruh ba kino kino ki kali kiba pynkhein ïa kane ka kyndon kin ngat ha ki kyndon jong ka ain katkum ka kyndon 223 jong ka BNS bad kiwei kiwei ki kyndon.
La pyntip ruh ba kane ka hukum kan treikam mardor bad kan treikam tad haduh ban da pynbna da kumwei pat.
Ka kyrwoh ka ong ruh ba kane ka jingmaham ka long na ka bynta ka jingshngaiñ jong ki paidbah bad ruh ban khanglad ïa ka jingjulor kaba kham jur shuh shuh ïa ka jingkieng.