Madrid, ïaïong 11: Ka Real Madrid ka la nang pynduh jingkyrmen ïalade ha ka jingïakhun ïa ka nam lahduh jong ka La Liga mynta ka samoi hadien ba ka la ïakhaid noh da mar 1-1 kol pyrshah ïa ka Girona ha la ïing ha Santiago Bernabeu.
Kane ka jingïakhaid ka pynlong ïa ka Real Madrid ban shah tam da hynriew poiñ ha ka FC Barcelona ha ka miej kheiñ point ha kaba ka dang sah sa hynñiew tylli ki jingïalehkai ha kane ka samoi, katba ka Barcelona kan ïoh ïa ka lad ban pynjlan ïa ka jinglam khmat jong ka sha ka khyndai poiñ lada ka jop ïa ka Espanyol ha la ïing ha ka janmiet sngi saitjaiñ.
U Coach jong ka Real Madrid, U Alvaro Arbeloa, u la wanrah 7 tylli ki jingkylla ïa ka kynhun kaba la shah rem da 2-1 kol ha la ïing ha ka Champions League, ha kaba u Eder Militao, u Raul Asencio, u Jude Bellingham, u Dani Carvajal bad u Brahim Diaz, ki dei napdeng kito kiba la mih madan ha ka kynhun ba sdang, katba u Arda Guler udei uwei napdeng kiba la shah pynshong na ka bynta ka jingïakhun kaba kongsan la sngi Balang pyrshah ïa ka Bayern.
U Valverde u la pynkhihjar nyngkong ïa ka Real Madrid ha ka minit kaba 51 hynrei ka Girona ka la pynïakhaid tang hadien shi kynta tam ba la ïaid ka jingïalehkai lyngba u Thomas Lemar (62’).
Katba ki paidbah ha madan Santiago Bernabeu ki la nang duh jingkyrmen, u Arbeloa ula pynkylla katto katne ngut ki rangalehkai hynrei ka la long lehnohei namar ba ka Girona ka la bat skhem ïa ka poiñ kaba ïarap ïa ka jingpyrshang jong ka ban lait na ka jingshah pynhap kyrdan.
