La law lyngkhuit bad byrngem pynïap ïa kiba shah kem ha Mukroh, 2002 ruh 7 ngut shah siat

Shillong, Naiwieng 24: U Bah Nehemaia Tyngkan, Vice President ka Seng Congress, haba kren ha ka jingïalang sngewlem ïa kiba shah siat ha Mukroh, u la ïathuh ba ki lai ngut ki rangbah kiba la shah kem ha Mukroh ha ka step jong ka 22 tarik mynta u bnai, ki la shah rah sha khlaw ha ki Pulit Assam bad shah law lyngkhuit.
Ha kane ka jingïalang kaba la long ha Congress Bhavan, Shillong, u Bah Nehemaia, uban long ruh u Kyrtong ka Seng Congress na Mookaïaw ha ka elekshon MLA 2013, u la ïathuh ba hadien ba ki Pulit Assam, ki la law lyngkhuit ïa kine kiba shah kem ki la bom la shoh ïa ki haduh ba kin da jngem lut ki kti ki kjat bad ka met. Nangta ki la ai da u kwai ïa ki ba kin bam da kaba ong artad “Bam ïa une u kwai ba khatduh shuwa ba phin khlad noh”.
“Ka long ka jingjia bad ka jingleh beiñ kaba ym don kyntien shuh ban batai”, la ong u Bah Nehemaia uba dei ruh u trai shnong na katei ka thaiñ.
Haba ïathuh ïa khana ba shempap jong ki paidbah na Mukroh, kaba hap ha ka elaka Shiliang Myntang, West Jaiñtia Hills District, une u nongïalam ka Congress u la ong ba kane kam dei ka sien kaba nyngkong ba ki paidbah na Mukroh kin shah thombor bad shah lehbeiñ ha ki Pulit Assam, hynrei ha u snem 2002 ruh ki la don hynñiew ngut ki briew na katei ka thaiñ kiba la shah siat ïap ha ki Pulit Assam.
U la ong ba kadei ka buit jong ka Assam ban kynnoh ïa ki nongshongshnong kiba dei tang ki nongrep bad ki nongthoh dieng ban kynnoh ba kidei ki nongkhaïi dieng tuh tang ban ïoh pynbudnam ïa ki.
“Ki nong Mukroh kidei tang ki nongrep baduk bad ki nongthohdieng ba khlaw kim dei satia kita ki nongtuh dieng kumba la kynnoh da ka Assam”, la ong u Bah Nehemaia.
U la ïathuh ruh ba kane ka jingjia kaba la jia ka jingïasiat, kadei ka lynti ba ju leit repbad lei khlaw ki nong Mukroh bad ka jngai tang kumba 2 KM na Shnong ne tang kumba 500 ne 600 meter na ki ïing ki sem jong ka Mukroh. Ka jingmih ki paidbah ban dawa pyllait ïa kitei ki lai ngut, kadei namar ba shisien ba la kem da ki Pulit Assam ki longïing longsem ki hap ban mad bun ki jingeh namar kiba shah kem kin shah set da ki bnai bad poi ruh da ki snem nalor ba ki hap ban lut da ki lak tyngka ban pyllait ïa ki.
Ki paidbah bapli ki la shu shah siat kumba siat ki mrad, namar ba ki Pulit Assam kim shym la ai kano kano ka jingmaham ban siat pynma , hynrei la shu siat beit ïa ki. “Kaba sngewsih ka long ba ha kawei ka longkmie ha ka jingshah siat ha u snem 2002 ka la duh noh ïa u hymmen jong ka bad ha u 2022 pat ka la duh noh ïa la u jong u lok”, la ïathuh une u nongïalam ,da kaba bynrap ruh ba kine baroh san ngut kiba shah siat kidei ki nongkamai bad nongpyndap ïa ka ïing ka sem.
Nangta ha u snem 2021 ki Pulit Assam ki la shna ïa ka Police Out Post ba thymmai ha Saba marsyndah bad ka Mukroh. U Bah Nehemaia u la ïathuh bad ma u bad ki Sengbhalang ki la pyrshah ïa kane bad thoh ruh sha ki bor District jong ka Assam ban pynsangeh noh ïa kane, hynrei ki bor sorkar kim shym la sngap bad dei namar kane ka daw ba ki Pulit Assam ki la nang ïoh bor ban thombor ïa ki paidbah katei ka thaiñ.
I Kong Joplyn Dkhar, President ka Mahila Pradesh Congress Commitee, Meghalaya ha ka jingkren jong i, i la ong ba ki paidbah ki hap ban mad ïa ki jingjynjar, ki hap ban mad ïa ka jing shah thang kali dei namar ba ïa ka jylla la synshar da ki Khynnah ki bym don ka jingmut pyrkhat rangbah bad ki bym nud ban shim ki rai rangbah. I la ong ruh ba kane ka jingjia ha Mukroh kadei ban pynlong ïa ki nongïalam jong ka sorkar naduh u Myntri Rangbah, u Conrad Sangma, u Myntri Korbar ri, u Bah Lahkmen Rymbui ba kin shim ka jingkitkhleh ban hiar shuki noh namar ba kim lah ban ïada ïa ka jingim ki paidbah bad ki buh ruh ïa ki ha ka jingshong syier.