La lai sien phi jop MP, aïu phi la kren halor u pud u sam: Kylli u MDC NPP ïa u Bah Pala

Shillong, Jymmang 07 : Khyndiat bnai hadien ba u la mih noh na ka Congress bad leit ïasoh sha ka NPP, u MDC ka Rambrai Bah Bajop Pyngrope u la buh jingkylli ïa u President ka Meghalaya Pradesh Congress Committee kaei kaba u la leh ne kren ha Parliament na bynta u pud kum u MP uba la jop haduh lai sien mynta.
Haba kynthoh tyngeh ïa kane ha ka jingïalang paidbah jong ka NPP dang shen ha Saitsohpen, utei u MDC u la ong, “La lai sien phi la jop bad long kum u MP, aiu phi la leh bad aiu phi la kren halor ka jingeh kaba ïadei bad u pud u sam.”
Nalorkata, u la ong ruh ba ka jingkren pyrshah jong u Bah Pala haba ïadei bad ka sienjam ba la shim da ka sorkar MDA na ka bynta ban pynbeit ïa u pud u sam hapdeng ka Meghalaya bad Assam kadei ka bym shongnia ei ei namar ïalade watla u la jop haduh lai sien kum u MP u khlem lah ban leh ei ei.
“Ki paidbah kim dei ban shah ïalam bakla ha kum kine ki jingkynthoh, namar nga kum u nongïalam na ka thaiñ khappud, nga sngewthuh bha katno ka jingeh kaba mad na ka por sha ka por, ka jingïatyngkhuh bad shah pyndik na ka Assam,” la bynrap shuh shuh u Bah Bajop.
Da kaba kubur ba ki duh katto katne ki shnong ha ka jingpynbeit pud u Bah Bajop u ong ba ki don bun ki daw kiba ki paidbah kim tip.
U Bah Bajop u la ong ba u kwah ban pynpaw ba hapoh ka Rambrai Constituency kaba u mihkhmat, ki shnong kiba paw kyrteng ha ka jingïakren pynbeit pud baorh ki shah kynthup lut sha Meghalaya. “Mynta dang ïohi bad sakhi tang ïa kito kiba ïakhih ki bym shym la shah pynngat hapoh ka jylla, hynrei ha kine ki khyndiat sngi yn sa ïohi ba kin sa don kiba bun ki ban ai khublei ïa u Myntri Rangbah ka jylla u Conrad K Sangma, kiba la shah pynkynthup sha Meghalaya,” u la bynrap lang.
Ha kawei pat ka liang, u Bah Bajop u la pynpaw ka jingsngewkhia ban ïohi ba u Dr. Mukul Sangma, Myntri Rangbah barim ka Jylla ba dei ruh u Nongïalam ka Liang Pyrshah ka Iing Dorbar Thawaiñ namar ka jingsmat jong u ban hiar jurip sha ki shnong khappud. U la buh jingkylli ruh ba kaei kaba pynlong ïa u ban sngap jar bad khlem leh ei ei ha ki phra snem ba u don mynshwa kum u Myntri Rangbah.
U la ong, mynta haba ki Myntri Rangbah ka Meghalaya bad Assam ki la wan shakhmat ban pynbeit ïa u pud, kumta ka la mih ka jingsngew lynga ha kiwei pat ki seng, ba ka NPP ka la khlaiñ bad nang ïoh bor hadien ba ki la lah ïa kane ka mat, ba la angnud la 50 snem. La kynnoh ruh ba dei na kane ka daw ba ki la sdang pyrshang ban pynthut pynwit ïa kane ka bynta kaba kongsan ka ban dei ka jingmyntoi na ka bynta ki samla bad ka lawei ba kin nym shah pyndik shuh.