Jowai, Jylliew 21: Ka Art of Living Jaiñtia Hills Unit ha ryngkat ka Dorbar Chnong Chilliangraij kala ïasnohkti lang bad ka pyrthei hi baroh kawei, kala kynmaw burom ïa ka 8th International Yoga Day mynta ka sngi 21 tarik ha Dorbar Hall ka shnong Chilliangraij.
Na ka liang u P. Toi, President Art of Living Jaiñtia Hills Unit uba long kum u nongai jinghikai (instructor) ula ai mynsiem ïa baroh kiba la wan ban ïashim bynta, da kaba pynkymmaw ruh shaphang ka nongrim jong ka Yoga bad ki rukom kiba dei ban leh manla ka sngi khnang ban ïoh ïa ka bor met kaba koit ba khiah naduh ka bor pyrkhat bad ka mynsiem kumjuh.
Ka Dorbar Shnong Panaliar ruh ka la shim bynta lang ha kane ka sngi lyngba ka Panaliar Women’s Welfare Committee, Jowai, katba ha Shangpung, Laskeiñ Block la kynmaw burom ïa kane ka sngi da kaba pynlong ïa ka prokram kyrpang ha Auditorium Hall Shangpung Pohshnong.
