Nongstoiñ, Nohprah 22: Ka shnong Nonglang West Khasi Hills kaba don harud ka surok Rwiang-Langja kaba hap hapoh ka Mawshynrut Civil Sub Division, ka dei ka shnong kaba kiew sted ba ha baroh liang bad ka la rung ha ka thup kyrteng kum ka Model village napdeng ki shispah khathynriew tylli jong ka Mawshynrut Block.
U bah Ailand Lyngdoh sordar jong katei ka shnong haba ïakren bad u nongthoh khubor, u la ong ba kum u sordar bad ki paitbah shnong ki sngew ban ai khublei ïa ka sorkar ba ka la ithuh ïa ka kumka Moderl village, ha kaba ka sorkar ka la pyntip ba ki don shibun bah ki skhim na ki tnad trei kam bapher bapher ïa kiba yn sa pyntreikam ha katei ka shnong, hynrei haduh mynta ka jingpyntrei kam ïa kita ki skhim kam pat urlong satia.
U la ong ba lada phai sha ka jinglong jingman jong katei ka shnong ka dei ka shnong kaba la paw bha ha ka thaiñ Rimuliang. Ka dei ruh ka shnong kaba long pdeng bad haba don ki jait jingïalang la ki dei ki jingïalang jong ki kynhun Balang, ki sengbhalang, ki prokram sorkar la ju pynlong ha katei ka shnong.
Nalor kata ka PHC ka la don, ka Veterinary ophis ka lah don, bad ïa ka Temporary Block Ophis jong ka Rimuliang Bloc ruh la wan plie bad buh maw nongrim ha katei ka shnong, ka surok ka la biang bad ka la don ruh ka Higher Secondary School kaba la seng naduh u snem 2014 bad ki khynnah kiba wan pule ha katei ka skul ki la bun bha, khamtam eh kito ki khynnah kiba dei na ki long ïing kiba duk ki bym ïoh lad ban leit pole sha kiwei pat ki jaka hadien ba ki la pass ïa ka SSLC. Namar ba ki don ka jingthrang ban bteng ïa ka jingpule sha ka class XI bad XII bad ki kyrdan kiba kham shajrong.
Ha kaba ïadei bad ka jingkyntiew kyrdan ïa ka secondary sha ka Higher secondary school, utei u nongïalam shnong u la ong ba ka jingkyntiew kyrdan ïa katei ka skul, ka dei hadien ba ka shnong ka la ïohi ba ki don shibun bah ki long ïing long sem kiba duk.
Bun ki thrang bad ki angnud ba ki khun kin ïoh ïa ka jingpule kaba biang, tangba namar ba kim kot bor ban phah sha kiwei ki jaka bun na ki wat lada ki la pyndep ïa ka SSLC Exam ruh, ki hap ban sangeh noh kumta ka shnong da kawei ka jingmut, ka la rai ban kyntiew kyrdan noh ïa ka Secondary sha ka Higher secondary school.
ïa ka jingsiew na ka bynta ki nonghikai kawei pa kawei ka long ïing hapoh ka shnong ki hap ban shim ïa ka jingkitkhlieh ban pynmih ïa u synñiang, katkum ba la pynbeit ryntih da ka dorbar shnong bad haduh mynta ka Higher secondary school ka la kynjoh shipihew snem kynthih hynrei ym pat ïoh jingïarap na ka sorkar.
U la ong ruh ba wat la katta ruh ki long ïing longsem hapoh ka shnong ki dang ïa ksaid kat lah kat ïai ban sei bor ïa u synñiang ba la pynkit na ka bynta ban siew tulop ïa ki nonghikai.
U la ong ruh ba wat la ka Higher secondary school ka dang don tang haduh ka Art Stream, na ka liang ka shnong ka la pyrshang ban thaw ki lad ki lynti ban buh sa kiwei pat ki kyrdan khnang ba ki khynnah kiba thrang ban bteng ïa ka jingpule kin ïoh lad bad kin lait na ka jing leit sha kiwei pat ki jaka ba jngai.
