La kot ïa u mawmer ha ka jingpynkhlaiñ ïa ka lad ai jingtip bad ka jingpynïasoh ïa ka deiriti lyngba ka jingplie paidbah ïa ka 10 KW FM transmitter ha Akashvani Kokrajhar lyngba ki lad digital na Guwahati mynta ka sngi.
Ha kane ka prokram la wan ïashim bynta da u Lakshman Prasad Acharya, Lat ka jylla Assam; AshwiniVaishnaw, Myntri Sorkar Pdeng ba dei khmih ïa ki tnad Kam Rel, Information & Broadcasting bad Electronics & Information Technology; bad Dr.Himanta Biswa Sarma, Myntri Rangbah jong ka Assam.
Ka Akashvani Kokrajhar, kaba la sdang ha u snem 1999 ka dei ka rynsan ban kyntiew ïa ka deiriti ba hiar pateng jong ki jaitbynriew ha Kokrajhar. Kane ka steshon ka don ka bynta kaba heh ha ka jingai ïa ki prokram kiba ïadei bad ka pule puthi, ki jingtip bad ki prokram pynbyrnia ha ki ktien tynrai.
Da kaba ithuh ïa ki jingduna ha ka 20 KW Medium Wave transmitter ba la rim bad ka jingduna ka jingïar jong ka 100 Watt FM transmitter kaba la pynbiang ha u snem 2012, ka jingwanrah ïa une u 10 KW FM transmitter ba khlaiñ ka dei ka sienjam na ka bynta ka jingkylla.
Une u transmitter ba thymmai un pynbiang ïa ki FM broadcast ba bha haduh 70 kilometre bad kyntiew ïa ka jingpynpoi prokram sha 30 lak ki briew jong ka Kokrajhar bad ki distrik ba don hajan kum ka Dhubri, Bongaigaon bad Chirang. Kan pynthikna ba ka Akashvani Kokrajhar ka ïasoh kham bha bad ki nongrep, ki samla bad ki briew, bad pynurlong ïa ka kam jong ka kum ka nongai jingtip ïa ka ri.
Ka Akashvani Kokrajhar mynta kan pynkhlaiñ ïa ki kam jong ka ban pynneh ïa ka deiriti lyngba ka jingai shuh shuh ki prokram kiba ïadei bad ki jingrwai tynrai jong ki Bodo, ki jingrwai, Rajbongshi bad kiwei kiwei ki jingrwai jong ki riewlum.
U Pramod Boro, Chief Executive Member, Bodoland Territorial Council u la ïashim bynta ha kane ka prokram lyngba ki lad digital. U la ai jingsngewnguh na ka liang ki briew jong ka Kokrajhar bad ka Bodoland Territorial Region, ha kaba u la ai jingsngewnguh ïa u Myntri Rangbah Duh bad u Vaishnaw kiba la pynurlong ïa ka jingkyntu kaba la slem jong ki Bodo ban kyntiew ïa kane ka Akashvani radio center ha Kokrajhar.
Ka Pragya Paliwal Gaur, Director General, Akashvani ha ryngkat kiwei kiwei ki ophisar bad ki nongtrei jong ka Akashvani ki la ïadonlang ha kane ka prokram.
