Shillong, Nohprah 16: Ka District Magistrate jong ka East Khasi Hills District kala pynbna da ka hukum hapoh ka kyndon 163 jong ka BNSS kaba khang pyrshah ia ki kali heh ban kit palat 9 MT ban iaid lyngba na ka surok Thangsning-Thynroit-Mawpyrshong bad na ka surok Mawkynrew-Mynsang-Jatah .
Kane ka hukum ka long hadien ba la mih ki khubor ba ki kali kiba la kit palat ki iaid lyngba ki surok ba la kdew haneng hapoh ka Mawkynrew C & RD Block kaba wanrah ia ka jingjulor kaba jur bad kaba sdang ban pynjot ia ka tnad PWD bad ka surok shnong kaba kan wanrah ia ka jingsniew kaba bteng bad ka jingma ia ki nongleit nongwan bad ki nongshong shnong lada ym lah ban pynbeit ia ka jingshngain jong ki paidbah.
Kino kino kiba lap ba ki pynkhein ia kane ka hukum kin shah pynngat ha ka ain hapoh ka kyndon 223 jong ka BNS bad kiwei kiwei ki kyndon ain kiba iadei bad kane.Kane ka hukum ka treikam mardor bad kan dang treikam haduh ban da pynmih da kum wei pat.
