Shillong, Naiwieng 19: Ka ophis Deputy Commissioner & Chairperson, District Task Force on Child Labour, East Khasi Hills District, ka la pyntip ïa ki paidbah ba ka Child & Adolescent Labour (Prohibition and Regulation) Act, 1986 ka la khang pyrshah ban pyntrei ïa ki khynnah kiba hapoh ka 14 snem ka rta ha kino kino ki kam. Ym shah ruh ïa ki samla kiba hapdeng ka 14 bad 18 snem ka rta ba ki shah pyntrei ne ban shah ba kin trei khamtam ha ki jaka trei kiba don jingma bad kane ka dei kaba la buh hapoh ka Schedule jong ka Act.
Kino kino kiba pyntrei bad kiba pynkheiñ ïa kane ka aiñ kin shah pynshitom da kaba shah set patok kumba 6 bnai, kaba lah ruh ban pynjlan shaduh ka 2 snem ne ka jingshah shaiñ kuna kaba ym duna ïa ka T. 20,000/- bad kaba lah ruh ban pynheh sha ka T. 50,000/- ne baroh ar.
Kino kino ki jaka khaïi kidei ban wah ïa kine ki jingmana kaba la thoh ha ka ktien kaba sngewthuh da ki paidbah ba kynthup ruh ha ka ktien phareng kumba la bthah hapoh ka Section 3 bad 14 jong kane ka aiñ.
Kino kino ki bym leh ïa kane kin shah set shibnai kaba kynthup bad ka jingshah shaiñ kuna kaba long kumba T. 10,000/- ne baroh ar.
