Mairang, Nailar, 26: Hadien ba la ïoh jingujor halor ka jingpynlong ïa ki jingïakob khwai dohkha, da katto katne ki nongshong shnong ha ki pung dohkha bapher bapher kiba don hapoh Eastern West Khasi Hills District, ha kiba ka bai rung kam duna ïa ka 500/- (San spah) tyngka shi ryngwiang bad ka khusnam sha ki nongjop ka bym duna ïa ka 15,00,000 /- (khatsan lak) tyngka.
Kumta, u District Magistrate ka Eastern West Khasi Hills District, ha ka hukum ba la pynmih ha ka 23 tarik u Nailar 2022, hapoh ka Section ba 144 jong ka CrPC, u la pakhang ïa ka jingpynlong ïa ki jingïakob khwai dohkha, ha kiba ka khusnam sha ki nongjop ka long palat ïa ka 1,00,000 /- (shi lak) tyngka bad ka bai rung kaba palat ïa ka 100/- (shi spah) tyngka shi ryngwiang.
Shuh shuh, katkum kane ka hukum, yn ym shah ban pynlong jingïakob khwai dohkha palat ïa ka ar sien shi snem ha kajuh ka pung. Ïa kane ka hukum la pynmih da u District Magistrate, kum shi bynta ban khanglad ïa ka jingpyndonkam bakla bad jingsngewthuh bakla ïa ka Amusement Act. Kumjuh ruh ban khanglad ïa ka jingshah shim kabu jong ki duk ki suk ki bym da biang tikna ka kamai kajih.
Kino kino kiba pynkheiñ ïa kane ka hukum, kin shah pynshitom katkum ka Section ba 188 jong ka Indian Penal Code, 1860, bynrap shuh shuh ka hukum u District Magistrate.
