Nongstoiñ, Rymphang 15: Ka District Magistrate West Khasi Hills District Nongstoiñ, ka la pynmih ïa ka hukum katkum ka Section 163 jong ka Bharatiya Nagarik Suraksha Sanhita (BNSS), kaba khang pyrshah ïa ka jingtih dewiong beaiñ bad ka jingshalan beaiñ ïa u dewiong hapoh ka District.
Ïa kane ka hukum la pynmih namar ka jingbteng ban pynkheiñ ïa ki jingbthah ba la pynmih da ka ïingbishar ba don burom jong ka National Green Tribunal, ka Ïingbishar ba ha khlieh duh jong ka ri India.
Na ka liang ka Ïingbishar ba don burom jong ka Meghalaya (High Court of Meghalaya) ka la lap ba ka jingtih dewiong thliew ka buh jingma kaba khraw ïa ka jingim briew, ka mariang bad ka jingsuk ha ka jingim paidbah.
Kumta halor ka jingpyndonkam ïa ka bor ba la pynkup katkum ka kyndon 163 BNSS, ka Hema Nayak IAS, District Magistrate ka West Khasi Hills District, ka la khang pyrshah tyngeh ïa ka jingtih dewiong beaiñ hapoh u pud u sam jong ka West Khasi Hills District.
La khang pyrshah ïa ka jingshalan ïa kino kino ki jait dewiong ba la tih beaiñ hapoh ka district bad shabar ka district.Kano kano ka jingpynkheiñ ïa kane ka hukum kan khring ïa ka jingpynshitom katkum ki kyndon aiñ.
