Mairang, Jylliew 7: U District Magistrate ka Eastern West Khasi Hills District, ha ka hukum ba la pynmih ha ka 3 tarik u Jylliew 2022 katkum ka Section ba 144 ka CrPC, u la mana bad pakhang ïa ka jingtih shyiap ha ki jaka ka shnong Ksehkohmoit bad ha Krohbah, kaba don ha shnong Langtor kiba hap hapoh ka Eastern West Khasi Hills District.
U District Magistrate u la pynmih ïa kane ka hukum, hadien ba la ïoh jingujor halor ka jingdon jong ki briew kiba tih shyiap, da kaba pyndonkam ruh ïa ki kor ki bor ban pynkhuid ïa u shyiap ba lah dep tih. Kane ka jingleh ka long beaiñ bad ka pynjaboh ruh ïa ki wah ba marjan kynthup ïa ka wah Kynshi.
Kane ka jingtih shyiap ka buh jingma ïa ki dohum dohwah ha ki wahduid bad wahbah ha kitei ki jaka, bynrap shuh shuh ka hukum u District Magistrate.
