Khliehriat Iaiong 12: Ha ka jingialang ba la pynlong mynta ka sngi ha ophis treikam jong u kyrtong ka NPP, u ma Nehlang Lyngdoh ha Ladrymbai Dongwah, la ioh ban jied bad pynskhem ïa ki nongkitkam bad ki dkhot jong ka National People’s Youth Federation (NPYF) East Jaiñtia Hills District ha ka jing ïa don ryngkat lang ki MDC ba rim bad ki riew rangbah jong ka thaiñ.
Ki nongkitkam kiba la jied bad pyn skhem ki kynthup, u President, u bah Jop Dkhar uba na ka shnong Molamanoh, Vice President, u bah Letmon Pyrtuh, uba na shnong Bataw, General Secretary, u bah Ringku Swer, uba na Khliehriat West, Secretary, u bah Dawyoo Lyngdoh, uba na Dienhynrum,Treasurer, u bah Daniel Dkhar, na Rymbai, Adviser, u bah Skhemmon Rymbai, na Lad Rymbai bad u bah Earlyborn Lyngdoh, uba na Rymbai.
Haba kren ha ka jingialang, u MDC ba rim jong ka Bataw, u bah J.R.Pyrtuh, u ai ki kyntien sneng kyntu ïa ki nongkitkam bad ki dkhot ba kin ïa treilang kum ka kynhun ban kyntiew ïa ka party NPP ban wanrah ïa ka jingjop bad kum ki samla jong ka thaiñ ba kin don ruh ka jingkitkhlieh ban kyntiew ïa ka bha ka miat ha ki shnong ki thaw, u bah Pyrtuh u la ai jingmut ruh ba kan bha ban thaw noh da ki Unit bapher bapher ha man la ki shnong khnang ban dup pynkhlaiñ ïa ka rukom treikam.
Kiba la ai jingkren ha ka jingialang ki kynthup u General Secretary NPP East Jaintia Hills, u Lalminga Ngamlai, u Waheh Shnong ba rim jong ka Ladrymbai, u bah Skhemmon Rymbai, u Secretary NPYF East Jaintia Hills, u bah Dametreyoo Rymbai bad kiwei kiwei, ia ka jingialang la pyniaid da u President ka Seng NPYF East Jaiñtia Hills District, u bah Grimlang Dkhar.
