Shillong, Jylliew 28: Ka kynhun ki nonghikai SSA hapoh ka lama jong ka All Meghalaya SSA School Teachers Association (AMSSASTA) kan thoh sha ka sorkar namar ba ki khlem ïoh tulop mynta la hynriew bnai, la ong u bah Last Marngar President ka seng.
U bah Marngar la ong ba kum ka seng ki nonghikai kam kwah ban mih sha surok ban shu ïa mih paidbah, hynrei ka kyntu ïa ka sorkar ba ka dei ban shim khia ba ki nonghikai ki dei ban ïoh ka tulop kaba dei naduh u bnai Kyllalynglot haduh mynta u bnai Jylliew 2022 kaba mut hynriew bnai.
Kane ka jingbym ïoh tulop mynta hynriew bnai kala ktah ïa ki lng ïing longsem haduh ba ka la poi ka pud ba tang ban siew ïa ka bai skul ki khun ruh kila shem jingeh haduh katta katta wat ba kin pynbiang ïa ka bam ha ïing ka sem ruh. Ka seng AMSSASTA kam kwah ban ïa mih madan hynrei ka kyrpad ïa ka sorkar ban sngap lem ïa ka jingpynsngew jong ki nonghikai.
Ka AMSSASTA kala ïa kren bad ki ophis jong ka tnad pule puthi kiba peit kyrpang ïa ka kam jong ki nonghikai SSA hynrei ka jubab ka long ba haduh myta ka sorkar kam shym la pynlait pisa ban siew ïa ka tulop jong ki nonghikai ba dei na ka SSA haduh mynta u bnai Jylliew ruh la kut kumta ka jingbym pat ïoh tulop jong ki ka long 6 bnai.
Ka AMSSASTA ka don ha pdeng ka jingar tatien la ka sorkar jylla kala thep ne em ïa ka bhah jong ka jylla namar ïa ka tulop jong ki nonghikai SSA dei kaba ïa bei lang ha pdeng ka sorkar pdeng bad ka sorkar jylla ha ka jingkheiñ ha ka ratio kaba 90:10 la ong u President bah Last Marngar.
