La ithuh kyrteng ïa uba ïap shah bat bording ha Mawwan Mylliem, kynnoh ba u ju donkti ha ki kam tuh

By Mawphor Editor On Oct 6, 2025

Shillong, Risaw 05: Uwei u briew uba la pynthikna ba u la khladnoh hadien ba u la shah bar ha ka bording elektrik ha Mylliem Mawwan, East Khasi Hills District ha ka 2 tarik mynta u bnai, la lah ban ithuh kyrteng.
Utei u Rangbah uba la khlad la ithuh kyrteng da u Bah Pynbeit Sohkhlet uba dei u nongshong shnong ka Laitlyngkot. La kynnoh ruh ba u la dei u briew uba donkti ha ki kam tuh kam thiem bad uba la shah kynnoh ruh ha ki kam tuh pyrshah ïa u.
La kynnoh ba kane ka jingjia ka la jia hadien ba u Bah (L) Sohkhlet u la pyrshang ban tuh ïa ki masi napoh kawei ka sem masi, kaba dei ka sem kaba la pyndait ruh da ka bording elektrik da ka trai ka sem masi, ka Kong Staibon Nongdhar, kum ka jingïada na ki kam shah tuh masi kiba la jia manla ka por.
Ka kong Nongdhar ka la kam ba ka jingpynpur da ka bording elektrik ha ka sem masi ka long ban ïada ïa ki jingri jong ka ym pat ban pynmynsaw ïa ki nongtuh.
La kynnoh ruh ba la lap na ka met jong u Bah Sohkhlet ïa kawei ka tiar kaba nep bad na ka liang ki bor pynïaid ki la pynskhem ba ym don mano mano na ka shnong kiba ithuh ïa u.
U Bah C Lyngdoh Rangbah Shnong jong ka Mylliem Mawwan u la ong ba ki pulit napoh Pynursla Police Station ki la pynthikna ba u dei na ka shnong Laitlyngkot.
Hadien ba la pyndep ïa baroh ki kam katkum ka aiñ, na ka liang ki pulit ki la pynkitnoh ïa ka met u Bah Sohkhlet sha Civil Hospital Shillong ha shwa ban aiti noh ïa ka met jong u sha ki bahaïing hasem.
Ka jingshah tuh ki jingri kaba manla ka por ha kane ka thaiñ ka la wanrah ka jingsngewkhia bad da ka jingïoh kaiphod ba ki jingri ne ki masi kiba shah tuh ki don ruh ka jingïadei bad ka kam khaïi tuh sha ri Bangladesh.
Kumta ban jubab ïa kum kine ki jingjia, katto katne ngut ki nongri jingri ne ki nongrep ki la pyndonkam da kaba pyndait ïa ka bording elektrik sha ki jaka ne sem masi ban khanglad ïa ki nongtuh.
Hynrei kane ka jingjia pat ka long kaba wanrah ki jingma haba shim ïa kine ki sienjam ban ïada na ki kam shah tuh shah thiem.