Shillong, Jylliew 28 : Da ka jingtrei shitom bad ïai bud dien jong ki pulit ka East Khasi Hill ïa ki briew kiba donkti ban shoh ïa ki arngut ki samla pule na Kerala u Rejaz Sydeek bad u Sarath Thambi ha Jaiaw ha ka 24 tarik mynta u bnai Jylliew, ki pulit ki la ïoh ban kem shwa saw ngut ki briew kiba ïadonkti bad ïa kiwei ki dang thwet jur ban ïoh kem.
Kine ki arngut ki samla pule ki dei kiba wan pyntbit ne leh Internship bad ka Impulse NGO Network bad ha katei ka sngi katba ki dang leit donkam sha Jaiaw bad rung bam ha kawei na ki Resturant, kyndit kyndit shwa ban siew ïa ka bai bam ne ka bill la wan tur kumba 30 ngut ei ei ki runar bym lah ban ithuh bad shoh beit ïa ki. Donbok ba ki don ki Khasi kiba wan tuklar ïa katei ka jingthombor ba sa lait im kitei ki arngut.
Na ka liang u SP (City) u bah Vivek Syiem u la ïathuh ba ki pulit ki dang tohkit bniah ïa kitei ki sawngut khnang ba kin tip ïa kiwei kiba ïadonkti bad ban leit kem ïa ki. U la pynpaw ruh ba um pat kwah ban ïathuh bniah shaphang kitei ki sawngut namar ka jingtohkit ban lap dien ïa kiwei ka dang ïaid shakhmat. Tang kawei ula ong “ Sngewtynnad ban ïathuh ba ka jingtreikam ka la sdang ban seisoh bad kin dang bun pat kiwei kiba dang hap ban leh ruh”.
Halor ka jingkynnoh ba ki don 10 ngut kiba shah rah na ki thaiñ Jaiaw, u bah Vivek ula ong ba kam long kaba shisha namar ym shym la rah ïano ïano ruh lait na kitei ki briew kiba la thikna ba ki donkti ha katei ka jingshoh ïa kitei ki arngut ki samla.
Haba la kylli hato ki dei ki dkhot jong kino kino ki seng, ula ong “ Ngim tip la ki don jingïadei bad kino kino ki seng hynrei tang kawei ka long ba ki dei kiba ïadonkti bad tang kata hi ka la biang ka aiñ kan sa leh ïa kaba donkam. U la ong ba ki pulit ki la tohkit bad bud dien bniah bha shwa ban leit kem ïa kitei ki briew naduh ka jingtohkit ïa kiba sakhi ïa ka jingjia, ka CCTV bad kumta ter ter.
